पिंपरी, ता. ४ : पिंपरी-चिंचवड येथून पंढरपूरला जाणारे भाविक, वारकरी तसेच पालख्यांच्या वाहनांना पथकर सवलत पास उपलब्ध करून देण्यात येत आहेत. हे पास चिंचवडगावातील पीएमपी बसथांब्याजवळील व्यापारी संकुल येथे असलेल्या वाहतूक मुख्यालयात तसेच पिंपरी-चिंचवड वाहतूक शाखेअंतर्गत असलेल्या सर्व वाहतूक विभागातून देण्यात येत असल्याची माहिती वाहतूक शाखेचे पोलिस उपायुक्त बापू बांगर यांनी दिली.
आषाढी वारीमधील सर्व मानाच्या पालख्या ज्या मार्गावरून जातात, त्या मार्गावरील सार्वजनिक बांधकाम विभाग, महाराष्ट्र राज्य रस्ते विकास महामंडळ, राष्ट्रीय महामार्ग, राष्ट्रीय महामार्ग प्राधिकरण यांच्या पथकर स्थानकांवर मानाच्या पालख्या तसेच वारकरी, भाविकांच्या वाहनांना ३ ते २१ जुलै या कालावधीत पंढरपूरला जाताना व येताना महाराष्ट्र शासनाच्या निर्णयानुसार पथकरात सवलत देण्यात आली आहे.