पिंपरी, ता. ५ ः शालेय जिल्हास्तरीय क्रीडा स्पर्धेमध्ये यंदा ९३ खेळांचा समावेश राहणार आहे. क्रीडा शिक्षक आणि क्रीडा मार्गदर्शकांच्या अडी-अडचणी असल्यास त्या सोडविल्या जातील, अशी ग्वाही जिल्हा क्रीडा अधिकारी महादेव कसगावडे यांनी शुक्रवारी दिली.
पिंपरी-चिंचवड महापालिका आणि पुणे जिल्हा क्रीडा परिषदेच्यावतीने, पिंपरीतील संत तुकारामनगर येथील आचार्य अत्रे रंगमंदिरात क्रीडा शिक्षक, मार्गदर्शकांची बैठक बोलाविण्यात आली. त्याबैठकीत बोलताना कसगावडे यांनी वरील ग्वाही दिली. महापालिकेचे अतिरिक्त आयुक्त विजयकुमार खोराटे, सहाय्यक आयुक्त (क्रीडा) पंकज पाटील, प्रशासकीय अधिकारी (क्रीडा) परशुराम वाघमोडे, क्रीडा अधिकारी अनिता केदारी, तालुका क्रीडा अधिकारी सोनिया लुथरा, राज्य शारीरिक शिक्षण शिक्षक संघटनेचे अध्यक्ष शरदचंद्र धारूरकर आदी यावेळी उपस्थित होते.
कसगावडे यांनी खेळ सहभाग, शासकीय सोयी-सुविधा, अनुदान याबाबत मार्गदर्शन केले. विजयकुमार खरोटे यांनी अध्यक्षीय भाषणात खेळाडूंना भौतिक सुविधा देण्याबाबत आणि विद्यार्थी कलागुणांना वाव देण्याबाबत सूचना केल्या. यावेळी काही क्रीडा शिक्षकांचा सत्कार करण्यात आला. परशुराम वाघमोडे यांनी शासकीय स्पर्धेसाठी आवश्यक वैद्यकीय सुविधांबद्दल मार्गदर्शन केले. क्रीडा पर्यवेक्षक बन्सी आटवे, दीपक कन्हेरे, अरुण कडुस, रंगराव कारंडे, गोरक्ष तिकोने, बाळाराम शिंदे, जयश्री साळवे यांचे संयोजनासाठी सहकार्य लाभले.

- पुढील आठवड्याभरापासून स्पर्धेला सुरवात करण्याचे नियोजन
- सुब्रतो मुखर्जी चषक फुटबॉल स्पर्धेने होणार प्रारंभ
- अनुदानित खेळ ४९, उर्वरित विनाअनुदानित खेळांचा समावेश
- खेळांचे प्रवेश ऑनलाइन प्रवेश अर्ज घेतले जाणार