चिंचवड स्टेशन नजीकच्या सुदर्शननगर अंतर्गत रस्त्यावरील गावडे मॅन्शन, सुखवानी सफायरसह आठ ते दहा सोसायटीमधील अरुंद रस्त्यावर दररोज सकाळी सोसायटीमधील श्वानप्रेमी मालक त्यांच्या पाळीव कुत्र्यांना फिरवत असतात. त्यावेळी कुत्र्यांची विष्ठा, मूत्र यांनी रस्त्यावर दुर्गंधी पसरून पर्यावरण व मानवी आरोग्यास धोका उत्पन्न होऊ शकतो. काही उत्साही नागरिक भटक्या कुत्र्यांना बिस्किटे आदी खाद्य पुरवतात. त्यामुळे, त्यांचा उपद्रव वाढला असून चाव्यापासून वाचण्यासाठी छोटे अपघात होत आहेत. पालिका प्रशासनाने या उपद्रवापासून नागरिकांना दिलासा देण्यासाठी दर तीन दिवसांनी श्वान पकडण्याचे पथक पाठवून श्वानांच्या स्थलांतराची/नसबंदीची व्यवस्था करावी. तसेच श्वान मालकांवर दंडात्मक कारवाई केल्याशिवाय इतर नागरिकांच्या अडचणी दूर होणार नाहीत असं वाटते.
- अशोक नागणे, चिंचवड.