चिखली, ता. ८ : ट्रान्सफॉर्मर आणि विजेचा खांब हलविण्याचे काम सुरू करण्यात आल्याने नेवाळे वस्ती येथे तास न तास होणारी वाहतूक कोंडी सोडण्यास काही प्रमाणात मदत होणार आहे.
चिखली - आकुर्डी रस्त्यावरच ट्रान्सफॉर्मर असल्यामुळे रस्ता चिंचोळा झाला आहे. त्यातच चाकण, तळवडे आणि चिखली एमआयडीसी परिसरातून येणारी वाहने तसेच पिंपरी, चिंचवड, साने चौक आणि घरकुल या मार्गे चिखलीकडे जाणारी वाहने सकाळी आणि सायंकाळी एकाच वेळी जात असल्याने नेवाळे वस्ती येथे तास न तास वाहतूक कोंडीचा सामना नागरिकांना करावा लागत आहे.
सध्या महावितरणकडून रस्त्यावरील ट्रान्सफॉर्मर हलविण्याचे काम सुरू आहे. मात्र, कायमस्वरूपी तोडगा काढण्यासाठी रस्ता रुंदीकरण हाच एकमेव मार्ग असल्याचे नागरिकांचे म्हणणे आहे. परंतु तूर्तास ट्रान्सफॉर्मर हलवल्यानंतर काही प्रमाणात वाहतूक कोंडी सुटण्यास मदत होणार आहे. त्यासाठी परिसरातील जागा मालकांनी सहकार्य केल्यास नागरिकांना वाहतूक कोंडीच्या विळख्यातून बाहेर पडणे शक्य होणार आहे.

काही दिवसांपूर्वी उपमुख्यमंत्री अजित पवार हे चिखली येथे आले असता त्यांच्याकडे नेवाळे वस्ती, चिखली गावठाण येथे होणारी वाहतूक कोंडीची समस्या सोडविण्याची मागणी करण्यात आली होती. याबाबत पवार यांनी महापालिका आयुक्तांशी बोलून चिखली परिसरातील समस्या सोडविण्याचे आदेश दिले होते. त्याला आता यश आले असून नेवाळे वस्ती येथील रस्त्यावर असलेला ट्रान्सफॉर्मर आणि विजेच्या खांब हलविल्यानंतर वाहतूक कोंडी सुटण्यास मदत होणार आहे.
विकास साने, सामाजिक कार्यकर्ते, चिखली