पिंपरी, ता. ९ : बहिणीने मनाविरुद्ध लग्न केल्याचा राग मनात धरून, भावाने दाजीचा डोक्यात दगड घालून खून केला. त्यानंतर डिझेलने मृतदेह जाळला. पुरावा नष्ट करण्यासाठी हाडे व राख पोत्यात भरून नदीत टाकून दिले. ही धक्कादायक घटना मोशीतील आदर्शनगर येथे घडली. याप्रकरणी विवाहितेचा सख्खा भाऊ, मेहुण्यासह तीन जणांना पोलिसांनी अटक केली असून, एक चुलत भाऊ फरार आहे.

अमीर महम्मद शेख (वय २५, रा. आदर्शनगर, मोशी, मूळ - राधे, ता. पारनेर, जि. नगर) असे खून झालेल्याचे नाव आहे तर त्याचा साडू पंकज विश्वनाथ पाईकराव (वय २८, रा. मार्तंडनगर, चाकण, मूळ - भिंगे आडगाव, जि. हिंगोली), सख्खा मेहुणा सुशांत गोपाळा गायकवाड (वय २२, रा. राधे, ता. पारनेर, जि. नगर) आणि सुनील किसन चक्रनारायण (वय ३३, रा. मोई रोड, चिंबळी) अशी अटक केलेल्या आरोपींची नावे आहेत. चुलत मेहुणा गणेश दिनेश गायकवाड (रा. राधे, ता. पारनेर जि. नगर) हा फरार आहे. मृत अमीर व आरोपी सुशांतची बहिण यांचा सहा महिन्यापूर्वी प्रेमविवाह झाला होता. त्यानंतर दोघेही मोशी येथे राहत होते. मात्र, हा विवाह अमीरच्या सासरच्या लोकांच्या मनाविरुद्ध झाला होता.
अमीर हा १५ जूनला कंपनीत कामाला जातो, असे सांगून निघून गेला. तो परत घरी न आल्याने त्याची पत्नी अरीना अमीर शेख हिने एमआयडीसी भोसरी पोलिस ठाण्यात बेपत्ता झाल्याबाबत तक्रार दाखल केली होती. या तपासात अमीर याला त्याचा साडू पंकज याने फोन करून बोलावून घेतल्याचे समोर आले. त्यानुसार, पोलिसांनी पंकजला २१ जूनला अटक केली. चौकशीत त्याने खुनाची कबुली दिली.
आरोपींनी आमीरला दारु पिण्याच्या बहाण्याने फोन करून बोलावून घेतले. त्यानंतर मेदनकरवाडी गावच्या हद्दीतील जंगलात ते दारू पित बसले. त्यावेळी पाठीमागून आलेल्या आरोपी सुशांत व गणेश यांनी आमीरला मारहाण करीत जंगलात ओढत नेले आणि डोक्यात दगड घालून त्याचा खून केला. मृतदेह जंगलात लपवून ठेवला. सुशांत व गणेश यांनी डिझेलने मृतदेह जाळून टाकला.
--------------------------------