पिंपरी, ता.३ ः ‘‘राजकीय पक्षांनी धार्मिक ध्रुवीकरणाची पद्धती अवलंबणे बंद करावे. धार्मिक स्थळांवर कारवाई करताना महापालिकेकडून भेदभाव केला जात आहे. शहरांमध्ये सर्वच धर्मीयांची बहुतांश प्रार्थना स्थळे अनधिकृत बांधलेली आहेत. अशा प्रकारच्या प्रार्थना स्थळांवर कारवाई करण्याबाबत सर्वोच्च न्यायालयाने व मुंबई उच्च न्यायालयाने वेळोवेळी निर्देश दिलेले असतानाही अशा प्रकारे महापालिका कारवाई करत आहे.’’, असा आरोप नॅशनल कॉन्फरन्स फॉर मायनॉरिटीचे अध्यक्ष राहुल डंबाळे यांनी पिंपरी येथे आयोजित पत्रकार परिषदेत गुरुवारी (ता. ३) केला.
नॅशनल कॉन्फरन्स फॉर मायनॉरिटीच्यावतीने मुस्लिम समाज प्रतिनिधींची संयुक्त बैठक आयोजित केली होती. बैठकीत नॅशनल कॉन्फरन्स फॉर मायनॉरिटीचे शहराध्यक्ष शहाबुद्दीन शेख, युसुफ कुरैशी, शाकीर शेख, हाजी गुलाम रसुल, इम्रान शेख, कारी इक्बाल उस्मानी, मौलाना उमर गाझी, मौलाना नय्यर नुरी, मुनाफ तरासगर आदी उपस्थित होते.
वक्फ बोर्ड सुधारणा विधेयकाला संघटनेकडून विरोध करण्यात येत असून या संदर्भामध्ये सुमारे १८ राज्यांमध्ये जनजागृती मोहीम सुरू करण्यात आलेली आहे. आज अखेरपर्यंत तब्बल १ कोटी ३० लाख पेक्षा अधिक मुस्लिम समाज बांधवांनी हे विधेयक रद्द करावे, अशी मागणी संयुक्त संसदीय समितीकडे केलेली आहे.