पिंपरी, ता. ११ : भोसरीमधील सुवर्णा फायबर या कंपनीला लागलेली आग अग्निशमन दलाच्या जवानांनी काही वेळातच आटोक्यात आणली. या दुर्घटनेत कंपनीचे नुकसान झाले असून आगीचे नेमके कारण समजू शकले नाही.
सुवर्णा फायबर या कंपनीच्या दुसऱ्या आणि तिसऱ्या मजल्यावर बुधवारी रात्री साडेअकराच्या सुमारास आग लागली. घटनेची माहिती मिळताच पिंपरीतील मुख्य अग्निशमन केंद्रासह चिखली, प्राधिकरण, तळवडे, मोशी, भोसरी उपकेंद्रातील एकूण नऊ गाड्या घटनास्थळी दाखल झाल्या.
अग्निशमन दलाच्या जवानांनी पाणी मारून आगीवर नियंत्रण मिळवले. दरम्यान, कंपनीतून दोन एलपीजी सिलिंडर व ज्वलनशील रसायनांचे ड्रम सुरक्षितरित्या बाहेर काढण्यात आले. या घटनेत सुदैवाने कोणीही जखमी झाले नाही.