पिंपरी, ता. ५ : घरफोडी करणारा सराईत चोरटा जयवंत ऊर्फ जयड्या गोवर्धन गायकवाड (रा. स्टार आहूरा सोसायटी, आंबेगाव, पुणे) याला गुन्हे शाखा युनिट दोनच्या पथकाने जेरबंद केले. त्याच्याकडून तेरा लाख रुपये किमतीचे सोन्याचे दागिने जप्त केले आहेत.
सांगवी पोलिस ठाण्याच्या हद्दीतील स्मिता अमोल बोत्रे (रा. श्री हाईट्स, जुनी सांगवी) यांच्या घरात लोखंडी कपात फोडून आठ लाखांचा ऐवज लंपास केला. या गुन्ह्याचा तपास सुरू असताना सीसीटीव्ही फूटजवरून हा गुन्हा जयवंत गायकवाड याने केल्याचे निष्पन्न झाले. त्याला चिंचवड येथील स्मशानभूमी परिसरातून ताब्यात घेतले. त्याच्याकडे कसून चौकशी केली असता त्याने गुन्ह्याची कबुली दिली. त्याच्यावर पिंपरी-चिंचवड व पुणे आयुक्तालयाच्या हद्दीत सत्तरपेक्षा अधिक चोरीचे गुन्हे दाखल आहेत. तो काहीही कामधंदा करीत नसून, पोलिसांच्या हाती लागू नये, यासाठी तो राहण्याचे ठिकाण बदलून वेषांतर करून वावरत असतो. त्याने सांगवी, पिंपरी हद्दीत घरफोडीतील सोन्याचे दागिने त्याची पत्नी विद्या हिच्या मदतीने सराफ व्यावसायिक गौरवकुमार श्यामसुंदर विजयवर्गीय (रा. आंबेगाव, पुणे) याला विक्री केल्याची माहिती दिली. दरम्यान, जयवंत याची पत्नी विद्या व चोरीचे दागिने घेणारा गौरवकुमार यांच्यावरही गुन्हा दाखल आहे. या कारवाईत जयवंत यांच्याकडून घरफोडीचे दोन गुन्हे उघडकीस आले असून, १३ लाख रुपये किमतीचे सोन्याचे दागिने जप्त केले.