पिंपरी, ता. ६ ः नाट्य संमेलनाच्या उद्‍घाटनप्रसंगी उपस्थित मान्यवरांच्या हस्ते ‘नांदी’ या स्मरणिकेचे प्रकाशन करण्यात आले. यात आजवर झालेल्या १०० नाट्य संमेलनाचे अध्यक्ष आणि त्यांच्या कारकिर्दीला उजाळा देण्यात आला आहे.
या सर्व नाट्य संमेलनाच्या अध्यक्षांचे फोटो, एका नाट्यरसिकांकडे असणाऱ्या १९६६ पासून नाटकाच्या तिकीट संग्रहाचे कोलाज, पं. नंदकिशोर कपोते, लावणी सम्राज्ञी संजीवनी मुळे - नगरकर यांच्यासह राष्ट्रीय कीर्तनकार चारुदत्त आफळे, पद्मश्री गिरीश प्रभुणे, पिंपरी चिंचवडचे आयुक्त शेखर सिंह, नाटककार व दिग्दर्शक अभिराम भडकमकर आदींचे लेख ‘नांदी’ मध्ये आहेत.
याशिवाय मधू जोशी, डॉ. वंदना गांगुर्डे यांचा ‘संगीत रंगभूमी व मराठी नाटक’ हा लेख, राज्य नाट्य स्पर्धेवर प्रकाश टाकणारा पी. डी. कुलकर्णी यांचा लेख याशिवाय वसंत अवसरीकर, भाऊसाहेब भोईर यांचेही लेख या स्मरणिकेचे वैशिष्ट्य आहेत.
या स्मरणिकेची संपूर्ण जबाबदारी ही अखिल भारतीय मराठी नाट्य परिषद, नियामक मंडळाचे सदस्य सुहास जोशी यांच्यावर सोपवण्यात आली होती. स्मरणिकेच्या तयारीसाठी तीस दिवसांपेक्षाही कमी दिवस मिळाले. मात्र अत्यंत कमी वेळात आम्ही हे शिवधनुष्य यशस्वीरीत्या पेलले, अशी भावना त्यांनी व्यक्त केली.