पिंपरी, ता. १२ : पिंपळे निलख येथील पीएमपीएमएल मुख्य बस स्थानकापासून डेक्कन, स्वारगेट तसेच विशालनगर येथून हडपसर येथे नियमित बस सुरू कराव्यात. यासह विश्रांतवाडी मार्गाच्या बसची संख्या वाढविण्याची मागणी पिंपळे निलख येथील ज्येष्ठ नागरिक गोविंद गायकवाड यांनी केली आहे.

पूर्वी येथून सुरू असलेल्या डेक्कन, स्वारगेट तसेच हडपसर या मार्गाच्या बस कोविड काळात बंद केल्यानंतर पुन्हा सुरू केल्या नाहीत. केवळ विश्रांतवाडी (बस क्रमांक १२६) ही बस चालू आहे. पण या बस अतिशय जुन्या अन् खिळखिळ्या असून रस्त्यात कुठेही बंद पडतात. या मार्गावरील बसही कमी केल्याने पिंपळे निलख किंवा विशालनगर येथील प्रवाशांना इच्छितस्थळी जाणे अवघड होत आहे. त्याबाबत माजी नगरसेवक अन् सामाजिक कार्य करणाऱ्यांना अनेकदा सांगूनही आजपर्यंत कोणतीच कार्यवाही झाली नाही. तरी संबंधित पीएमपीएमएल प्रशासनाने याकडे गांभीर्यपूर्वक लक्ष देऊन नागरिकांची अडचण दूर करावी. तसेच विश्रांतवाडीच्या बस सुस्थितीत ठेवाव्यात, अशी मागणी गायकवाड यांनी केली आहे.