पिंपरी, ता. २५ ः राज्यात सर्वत्र उन्हाचा चटका वाढलेला आहे. गेल्या काही दिवसांपासून पुणे जिल्ह्यातील बहुतांश ठिकाणांचे तापमानही ४० अंश सेल्सिअसच्या आसपास येऊन ठेपले आहे. मात्र, इतर भागांच्या तुलनेत पिंपरी चिंचवड शहर व परिसरात तापमानाचा पारा अधिक असल्याचे समोर आले आहे.
गेल्या आठवड्यात पाऊस झाल्यानंतर हे तापमान काहीसे कमी झाले होते. मात्र, पुन्हा एकदा उन्हाचा चटका वाढल्याने गुरुवारी (ता. २५) चिंचवडचे तापमान ४०.८ अंश सेल्सिअस एवढे नोंदविण्यात आले. पुण्यातील शिवाजीनगरच्या तुलनेत जास्त आहे. गुरुवारी शिवाजीनगरचे तापमान ३९.४ एवढे नोंदविण्यात आले.
गेल्या आठवड्यात शहरात या हंगामातील आतापर्यंतच्या सर्वाधिक म्हणजेच ४२.५ अंश सेल्सिअस तापमानाची नोंद झाली होती. मात्र, पुण्याचे आतापर्यंतचे सरासरी तापमान हे सर्वाधिक म्हणजेच ४१ अंश सेल्सिअस एवढे नोंदविण्यात आलेले आहे. एकूणच उद्योगनगरीतील उद्योगांची वाढती संख्या, वाढलेली वाहने यांच्यामुळे वाढलेले प्रदूषण व वाढलेले शहरीकरण, कमी होत असलेली वृक्षांची संख्या यामुळे शहरात उच्चांकी तापमानाची नोंद होत असल्याचे हवामान तज्ज्ञांनी सांगितले आहे.

गुरुवारी कमाल तापमान
चिंचवड ः ४०.८
तळेगाव ः ३९.८
राजगुरुनगर ः ४०.७
दापोडी ः ३७.८
लोणावळा ः ३६.६