वाकड : दुकानात काम करणाऱ्या कामगाराने मालकाच्या घरातून ऐंशी हजारांचा ऐवज चोरल्याची घटना काळेवाडीतील विजयनगर येथे घडली. याप्रकरणी हर्ष रवी कुंदनानी (रा. विजयनगर, काळेवाडी) यांनी दिलेल्या फिर्यादीनुसार त्यांचा कामगार मोहम्मद वसीम शरीफ सिद्दीकी (वय २४, रा. पिंपरी, मूळ- मुंबई) याच्यावर गुन्हा दाखल झाला आहे. आरोपी हा फिर्यादी यांच्या दुकानातील कामगार असून, त्याने गाडीमध्ये ठेवलेल्या चावीने फिर्यादीचे घर उघडले. घरातील सामान अस्ताव्यस्त करून बेडरूममधील कपाटात ठेवलेली पन्नास हजारांची रोकड व तीस हजार रुपये किमतीची दुचाकी घेऊन आरोपी पसार झाला.

बनावट स्पेअरपार्ट विक्रीप्रकरणी एकावर गुन्हा
थेरगाव : दुचाकीचे बनावट स्पेअरपार्ट विक्रीप्रकरणी गोविंद वनाराम सीरवी (वय ३०, रा. तापकीर चौक, काळेवाडी, मूळ- राजस्थान) याच्यावर गुन्हा दाखल झाला आहे. हा प्रकार थेरगाव येथील क्रांतीनगर येथे घडला. याप्रकरणी रेवणनाथ विष्णू केकान (रा. काळेपडळ, हडपसर) यांनी फिर्याद दिली आहे. आरोपीने स्वतःच्या आर्थिक फायद्यासाठी होंडा मोटार सायकल अँड स्कूटर इंडिया प्रा. ली. कंपनीचे एकूण तीन लाख ४९ हजार ७४१ रुपये किमतीचे बनावट स्पेअर पार्ट्‍स व होंडा नावाचे प्लास्टिक स्टिकर विक्रीसाठी ठेवले. ते ओरिजिनल असल्याचे भासवून ग्राहक व कंपनीची फसवणूक केली.

ताथवडेत सहा लाखांची वायर चोरीला
पिंपरी : कन्स्ट्रक्शन प्रोजेक्ट येथून सहा लाख रुपये किमतीची फ्लेक्झिबल कॉपर वायर चोरीला गेल्याची घटना ताथवडे येथे घडली. याप्रकरणी योगेश दत्तात्रेय शिंदे (रा. वडगाव खुर्द) यांनी दिलेल्या फिर्यादीनुसार अज्ञात चोरट्यावर गुन्हा दाखल झाला आहे. हिंजवडी पोलिस अधिक तपास करीत आहेत.