सोमाटणे, ता.११ ः सलग सुट्या व गावी मतदानाला जाण्यासाठी निघालेल्या नागरिकांमुळे शनिवारी (ता.११) सकाळी पुणे-मुंबई महामार्ग व द्रुतगती मार्गावर वाहनांच्या रांगा लागल्या.
शनिवार, रविवार व त्याला जोडून मतदानाची सुट्टी आल्याने शहरी भागातील काही नागरिकांनी थंड हवेच्या ठिकाणी पर्यटनाला जाण्याचा बेत आखला असून ते घराबाहेर पडले. तर काही शहरवासीयांचे मतदान गावी असल्याने तेही आपल्या वाहनांमधून मतदानासाठी गावाकडे निघाले. परिणामी, सकाळी अकरा वाजल्याच्या दरम्यान पुणे-मुंबई महामार्ग व द्रुतगती मार्गावर वाहनांची संख्या वाढली. वाढलेल्या वाहनांच्या संख्येमुळे वाहतूक कोंडी होऊ नये यासाठी महामार्ग पोलिस व टोल प्रशासनाने सकाळपासून योग्य नियोजन करून परतीची एक मार्गिका जाण्यासाठी उपलब्ध केली. त्यामुळे, वाहतूक कोंडी कमी होऊन प्रवाशांचा वेळ वाचला. याबाबत पोलिस उपनिरीक्षक आर.एल.भालचीम म्हणाले, ‘‘सलग सुट्यांमुळे सकाळी वाहनांची संख्या वाढली होती. परंतु, वाहतुकीचे योग्य नियोजन केल्याने वाहतूक कोंडी
टळली.’’
PNE24U19066, PNE24U19065