पिंपरी, ता. १२ : तळवडेतील गणेशनगर येथे दुधजन्य पदार्थांपासून आइस्क्रीम बनवणाऱ्या कारखान्याला आग लागली. यामध्ये कारखान्यासह एका वाहनाचे जळून नुकसान झाले.
या बाबत ज्ञानेश्वर भालेकर यांनी अग्निशमन केंद्राला माहिती देताच पिंपरी-चिंचवड महापालिकेच्या तळवडे उपअग्निशमन केंद्रासह प्राधिकरण, चिखली व मोशी उपअग्निशमन केंद्रांच्या गाड्या घटनास्थळी दाखल झाल्या. चार अग्निशमन गाड्यांसह २७ कर्मचाऱ्यांनी अवघ्या पंचवीस मिनिटात आगीवर नियंत्रण मिळविले. या आगीत दोन डीप फ्रिजर, आइस्क्रीम डेअरी उत्पादन, ग्लास ऑफ फ्रीजर, इन्सुलिटेड कंटेनर, संगणक, प्रिंटर, फर्निचर, विविध प्रकारचे कंटेनर, कंपनीचे पूर्ण पत्रा शेड व एक वाहन पूर्णपणे जळाले. ही आग शॉर्टसर्किटमुळे लागल्याचा प्राथमिक अंदाज वर्तविला जात आहे. सुदैवाने या घटनेत कोणीही जखमी झाले नाही.