पिंपरी, ता. २१ : मावळ आणि शिरूर लोकसभा मतदारसंघाच्‍या निवडणूक कामातून महापालिकेचे अधिकारी, कर्मचारी कार्यमुक्‍त करण्यात आले आहेत. सोमवारी (ता. २१) त्‍याबाबतची कार्यवाही करण्यात आली आहे. त्‍यामुळे लवकरच हे अधिकारी कामावर रुजू होतील. त्‍यामुळे महापालिकेचे कामकाज पुन्‍हा सुरळीत होणार आहे.
मावळ आणि शिरूर या दोन्ही मतदारसंघाची निवडणूक प्रक्रिया नुकतीच झाली. निवडणुकीच्‍या कामकाजासाठी महापालिकेचे अधिकारी आणि कर्मचारी नियुक्‍त करण्यात आले होते. त्‍यामुळे महापालिकेत शुकशुकाट होता. नागरिकांची कामे अधिकाऱ्याविना खोळंबली होती. मात्र, आता या कामांना पुन्‍हा गती येणार आहे. महापालिका अधिकारी आणि कर्मचाऱ्यांनी गजबजणार आहे. कारण निवडणुकीच्‍या कामकाजातून अधिकारी आणि कर्मचाऱ्यांना कार्यमुक्‍त करण्यात आले आहे. १३ मे रोजी मतदान प्रक्रिया झाली. मावळ लोकसभाअंतर्गत चिंचवड विधानसभा मतदारसंघ कार्यालयाकडून १४ मे रोजी अधिकारी, कर्मचाऱ्यांना निवडणूक विषयक कामातून कार्यमुक्त करण्यात आले. तर, पिंपरी विधानसभा मतदारसंघ कार्यालयाकडून १२० जणांना १७ मे रोजी कार्यमुक्त केले. तर, सोमवारी (ता. २०) ५० जणांना कार्यमुक्त केले आहे. तसेच शिरूर लोकसभाअंतर्गत भोसरी विधानसभा मतदारसंघ कार्यालयासाठी कार्यरत असलेल्या महापालिका अधिकारी व कर्मचाऱ्यांना १५ मे रोजी निवडणूक विषयक कामातून कार्यमुक्त केले आहे. मतमोजणीसाठी काही अधिकारी नियुक्त केले आहेत. मतमोजणी दिवशी हे अधिकारी कर्मचारी त्‍या ठिकाणी कार्यरत असतील. मतमोजणीसाठी आवश्यकतेनुसार नव्या नियुक्ती केल्या जातील, अशी माहिती अधिकाऱ्यांनी दिली आहे.
-------