पिंपरी, ता. २१ : महापालिकेच्‍या वतीने सलग दुसऱ्या दिवशी अनधिकृत होर्डिंगवरील कारवाई सुरूच ठेवली. मंगळवारी चिंचवड, रावेत, चिखली आणि किवळे परिसरात ही कारवाई करण्यात आली. यात चार होर्डिंग महापालिकेने काढले. तर अन्य भागात नऊ अनधिकृत होर्डिंग मालकांनी स्‍वतः काढून घेतल्याची माहिती महापालिकेच्‍या वतीने देण्यात आली.
आयुक्‍त शेखर सिंह यांनी दिलेल्‍या सूचनेनुसार ही कारवाई करण्यात आली. सहआयुक्‍त चंद्रकांत इंदलकर, उपायुक्‍त संदीप खोत, परवाना निरीक्षक, मजूर, एमएसएफ जवान, महापालिका सुरक्षारक्षक आणि कर्मचारी यात सहभागी झाले होते. सोमवारी पहिल्‍याच दिवशी पाच होर्डिंगवर हातोडा घातला. मंगळवारी (ता. २१) चार होर्डिंग जमीनदोस्त केले. यात कातळेवस्ती रावेत, किवळे येथील ३० फूट उंच आणि २० फूट रुंदीचा फलक, कातळेवस्ती रावेत येथील ३० फूट उंच आणि २० फूट रुंदीचा फलक. भोईर उड्डाण पुलाजवळ चिंचवड येथील ३० फूट उंच आणि ३० फूट रुंदीचा फलक, चिखली येथील २० फूट उंच आणि २० फूट रुंदीचा फलक असे मिळून चार होर्डिंग हटविण्यात आले.

नऊ ठिकाणचे होर्डिंग काढले
या कारवाईत नऊ अनधिकृत होर्डिंगधारकांनी स्‍वतः ते काढून घेतले. यामध्ये ४० फूट उंच आणि १० फूट रुंदीचा एक, १५ फूट उंच आणि १५ फूट रुंदीचा एक, १० फूट उंच आणि १० फूट रुंदीचा एक होर्डिंग हटविले. तर ३० फूट उंच आणि २० फूट रुंदीचे दोन होर्डिंग तर २० फूट उंच आणि २० फूट उंचीचे तीन आणि म्‍हाडा येथील एक होर्डिंग होर्डिंगधारकांनी स्‍वतःच हटविले. नवीन भक्ती शक्ती मुकाई चौक रस्ता, शनी मंदिर रोड वाकड, बापूजी बुवानगर मुंबई- बंगळूर महामार्गावर साई पेट्रोल पंप, भक्ती शक्ती चौक निगडी, यश साने पेट्रोल पंप चिखली, शेलार वस्ती देहू आळंदी रोड तळवडे, सोनवणे वस्ती चिखली, मंगलनगर आयवाना बिल्डिंग थेरगाव, म्‍हाडा प्रकल्‍प पुणे-मुंबई ताथवडे आदी ठिकाणी हे नऊ होर्डिंग लावलेले होते.

रेल्‍वे तसेच पीएमपीएमएल हद्दीतही कारवाई करणार
रेल्वे तसेच पीएमपीएमएल हद्दीतील अनधिकृत जाहिरात फलकांवर देखील कारवाई करण्यात येणार आहे. महापालिकेने त्‍याची कार्यवाही सुरू केली आहे. यासाठी रेल्वेच्या तसेच पीएमपीएमएलच्या जागेवर असलेले फलक शासन धोरणातील तरतुदीनुसार उभारले नसल्यास संरचनात्मक लेखापरीक्षण होणार आहे. यामध्ये अनधिकृत असलेले जाहिरात फलक किंवा होर्डिंग काढण्याबाबत संबंधित प्रशासनाशी पत्रव्यवहार करण्यात येणार असल्‍याचे महापालिका प्रशासनाने सांगितले.

महापालिकेच्‍या वतीने मंगळवारी अनधिकृत होर्डिंगवर कारवाई सुरूच ठेवली आहे. दिवसभरात चार होर्डिंग महापालिकेच्‍या वतीने काढण्यात आले. नऊ होर्डिंग नागरिकांनी स्‍वतःच काढले होते. चिंचवड, रावेत, किवळे आणि चिखली भागात ही कारवाई केली.
- संदीप खोत, उपायुक्‍त, आकाशचिन्‍ह व परवाना विभाग, महापालिका