पिंपरी, ता. ३ : ऑनलाइन फसवणूक करणाऱ्या सराईत आरोपीस पिंपरी-चिंचवड पोलिसांच्या सायबर सेलच्या पथकाने राजस्थान येथून अटक केली.
महम्मद जुबेर जावेद चव्हाण (वय २१, रा. फत्तेपूर, जि. सीकर, राजस्थान) असे आरोपीचे नाव आहे. बावधन येथील महिलेला गुगल रेटिंग टास्क देवून पूर्ण केल्यास अधिक रक्कम देण्याचे आमिष दाखवले. आरोपीच्या खात्यात रक्कम भरण्यास प्रवृत्त करून, महिलेकडून दोन लाख ४५ हजार रुपये घेऊन ऑनलाइन फसवणूक केली. याबाबत हिंजवडी पोलिस ठाण्यात गुन्हा दाखल आहे.
याबाबत तपास सायबर सेल करीत असताना फिर्यादीने पैसे पाठविलेल्या अकाउंटला तीन लाख रुपये ट्रान्स्फर झाल्याची माहिती मिळाली. त्यानुसार अकाउंटधारकाचा शोध घेतला असता, ही रक्कम चव्हाण याला पाठवल्याचे समोर आले. तांत्रिक विश्‍लेषणाद्वारे चव्हाण याचा या गुन्ह्यात सहभाग असल्याचे निष्पन्न झाल्याने सायबर सेलच्या पथकाने तीन हजार किलोमीटरचा प्रवास करून आरोपीला राजस्थान येथून ताब्यात घेतले. दरम्यान, चव्हाण हा दुबई येथील व्यक्तीस बनावट अकाउंट द्यायचा तसेच त्याने अनेक जणांची फसवणूक केल्याचेही तपासात समोर येत आहे. हिंजवडी पोलिस अधिक तपास करीत आहेत.