पिंपरी, ता. ३ ः व्हेरॉक करंडक (उन्हाळी) क्रिकेट स्पर्धेत ११ वर्षांखालील मुलांमध्ये यजमान व्हेरॉक-वेंगसरकर अकादमीच्या संघाने ५९ धावांनी विजय मिळवत जेतेपद पटकाविले. विजयी संघाचा गोलंदाज दर्श चनपूर सामनावीर ठरला.
स्पर्धेचे पारितोषिक वितरण ज्येष्ठ सामाजिक कार्यकर्ते राजीव कुलकर्णी यांच्या हस्ते झाले. भारतीय क्रिकेट संघाचे माजी कर्णधार दिलीप वेंगसरकर यांच्यासह अकादमीचे प्रशिक्षक शादाब शेख, भूषण सूर्यवंशी, चंदन गंगावणे, राहुल वेंगसरकर हे उपस्थित होते.
यावेळी मार्गदर्शन करताना वेंगसरकर यांनी तंत्रकौशल्य विकसित करण्याबरोबरच तंदुरुस्ती वाढविण्यासाठी परिपूर्ण व्यायाम, योग्य आहार आणि पुरेशी विश्रांती घेणे देखील अत्यंत गरजेचे असल्याचे नमूद केले. डॉ. विजय पाटील यांनी सूत्रसंचालन केले.
सर्वोत्तम गोलंदाज म्हणून दर्श चनपूर, सर्वोत्तम क्षेत्ररक्षक म्हणून रायन पानसकर (दोघेही व्हेरॉक-वेंगसरकर) स्पर्धेतील सर्वोत्तम फलंदाज आणि सर्वोत्तम मानकरी खेळाडू म्हणून वीरेन आटोळे (एच.के. बाऊन्स) यांना गौरविण्यात आले.
संक्षिप्त धावफलक ः
अंतिम सामना ः व्हेरॉक-वेंगसरकर ः २० षटकांत ८ बाद १३० - अद्विका जाधव ४४, अर्जुन शेटे २४ (शंभूराज निंबाळकर २/२१, ऋषिकेश देशमुख २/१३) वि.वि.एच.के.बाऊन्स ः २० षटकांत ७ बाद ७१ - वीरेन आटोळे ३४ (दर्श चनपूर ३/१०, शौर्य कांबळे २/२०);
पहिला उपांत्य सामना ः विराग ः २० षटकांत ७ बाद ७९ - विहान सुतार ४१ (वीरेन आटोळे ३/९) पराभूत वि.एच.के.बाऊन्स ः ११.३ षटकांत ४ बाद ८२ - वीरेन आटोळे ४४ (रयान ३/११);
आर्यन्स ः २० षटकांत ७ बाद १०३ - सार्थ बडदे ४७ (३/२५) पराभूत वि.व्हेरॉक-वेंगसरकर ः १४.३ षटकांत २ बाद १०४ - अद्विका जाधव ४६, सुधाकर राठोड ३७
PNE24U23801