पिंपरी, ता. ४ : पोलिसांच्या मोटारीने एका पादचारी महिलेसह दुचाकीला धडक दिली. या अपघातात महिला गंभीर जखमी झाली असून एका दुचाकीचेही नुकसान झाले आहे. ही घटना मंगळवार (ता. ४) बालेवाडीतील श्री शिवछत्रपती क्रीडा संकुल येथील पोलिस चौकीसमोर घडली. याप्रकरणी मोटर चालक सहायक फौजदारावर गुन्हा दाखल झाला असून त्याची वैद्यकीय तपासणी होणार आहे.
नागेश भालेराव असे पोलिस मोटार चालक सहायक फौजदाराचे नाव असून हिंजवडी पोलिस ठाण्यात ते नियुक्तीस आहेत. या अपघातात शंकुतला पंडित शेळके (रा. म्हाळुंगे) या जखमी झाल्या आहेत. मावळ लोकसभा मतदारसंघाची मतमोजणी मंगळवारी (ता. ४) बालेवाडी येथील श्री शिवछत्रपती क्रीडा संकुल येथे होती. तेथे कर्तव्यावर असलेले नागेश भालेराव हे शासकीय वाहनात बसले होते. त्यावेळी त्यांचा पाय ॲक्सिलेटर पडला. त्यामुळे, समोरून पायी जाणाऱ्या शकुंतला यांच्यासह दुचाकीला त्यांच्या मोटारीने धडक दिली. त्यामध्ये शकुंतला यांना गंभीर दुखापत झाली. तसेच एका दुचाकीचे नुकसान झाले. उपचारासाठी शकुंतला यांना खासगी रुग्णालयात दाखल केले असून त्यांची प्रकृती स्थिर आहे.

सहायक फौजदार नागेश भालेराव यांच्या ताब्यात असलेल्या वाहनाने महिलेसह एका दुचाकीला धडक दिली आहे. त्यामध्ये महिला जखमी झाली आहे. याप्रकरणी भालेराव यांच्यावर गुन्हा दाखल केला असून त्यांची वैद्यकीय चाचणी करण्यात येणार आहे. तसेच त्यांच्यावर कायदेशीर कारवाई देखील करण्यात येणार आहे.
- कन्हैया थोरात, वरिष्ठ पोलिस निरीक्षक, हिंजवडी पोलिस ठाणे