पिंपरी,ता. १२ ः शहरातील कलाप्रेमींना संगीताचे धडे मिळावेत, त्यांच्या कलेला व्यासपीठ मिळावे या उद्देशाने उभारण्यात येत असलेल्या भारतरत्न पंडित भीमसेन जोशी संगीत अकादमीच्या मुख्यालयाचे नूतनीकरण अंतिम टप्प्यात पोहोचले आहे. मुख्यालयात कलावंतांसह विद्यार्थ्यांसाठी विविध सोयी-सुविधा तयार करण्यात आल्या आहेत. त्यामुळे, मुख्यालयाचा चेहरा-मोहरा बदलला आहे.
शहरातील विद्यार्थी व कलासक्त मंडळींना संगीत शिकता यावे यासाठी २००० मध्ये या अकादमीला सुरूवात झाली. या अकादमीचे मुख्यालय निगडीतील संत तुकाराम महाराज व्यापारी संकुल येथे सुरू झाले. मात्र, देखभाल दुरुस्तीअभावी या मुख्यालयाची दुरवस्था झाली होती. मात्र, आता त्याचे नूतनीकरण केले जात आहे.

वर्षभरापासून सुरू होते काम
निगडीतील टिळक चौकाजवळ असणाऱ्या संत तुकाराम महाराज व्यापारी संकुलात तिसऱ्या मजल्यावर असणाऱ्या संगीत अकादमीच्या मुख्यालयाची गेल्या काही वर्षांपासून दुरवस्था झाली होती. येथील वर्गांमध्ये छतामधून गळती होत होती. वर्गांतील भिंतींचा रंग उडाला होता. स्वच्छतागृहांची दुरवस्था झाली होती. त्यामुळे, या मुख्यालयाचे नूतनीकरण व्हावे अशी मागणी केली जात होती. ही मागणी लक्षात घेता महापालिकेच्यावतीने गेल्या वर्षभरापासून नूतनीकरणाचे काम सुरू होते. त्यामध्ये येथील खोल्यांचे नूतनीकरण करण्यासोबतच येथे अत्याधुनिक सोयी-सुविधाही पुरविण्यात आलेल्या आहेत.

काय असणार नवीन सुविधा
- शास्त्रीय गायन, सुगम गायन, तबला, हार्मोनिअम या चार विभागांसाठी स्वतंत्र कक्ष
- प्रत्येक कक्षात अत्याधुनिक साऊंड सिस्टिम
- मुख्य सभागृहाचा कायापालट, स्टेज साऊंड सिस्टिमबरोबरच साऊंड बॅरिअर
- प्रत्येक कक्षात सीसीटिव्ही कॅमेरे
- प्रमुख कलाकार, पाहुण्यांसाठी ग्रीन रूमची सोय
- विद्यार्थ्यांसाठी आवश्‍यक पुस्तकांची लायब्ररी
- संगणक कक्ष व ऑडिओ लायब्ररी
- प्रत्येक कक्षाला संगीत क्षेत्रातील दिग्गजांचे नाव
- पंडित भीमसेन जोशी यांचे शिल्प
- कार्यालयाचे नूतनीकरण

लिफ्टचे काम अपूर्ण
या संगीत अकादमीमध्ये अनेकदा ज्येष्ठ कलाकारांचे मार्गदर्शनपर सत्र आयोजित केले जाते. येथे होणाऱ्या मासिक संगीत सभेला अनेक नागरिक हजेरी लावतात. अनेकदा संगीताच्या विविध मैफलींचेही येथे आयोजन केले जाते. मात्र, हे मुख्यालय हे तिसऱ्या मजल्यावर असून तेथे लिफ्ट नसल्याने संगीताच्या साहित्याची ने आण करणे किंवा ज्येष्ठांना चढून जाणे जिकरीचे ठरत आहे. त्यामुळे, येथे लिफ्ट उभारण्याचा प्रस्ताव मांडण्यात आला आहे. मात्र, त्यासाठी आवश्‍यक निधी उपलब्ध न झाल्याने लिफ्टच्या कामास विलंब झाला आहे.

व्यवस्थापकाची जागा रिक्त
सध्याच्या घडीला साडेतीनशे विद्यार्थी संगीताचे धडे घेत आहेत. सात ते आठ वर्षांच्या वयोगटापासून ते साठ वर्षांपर्यंतचे ज्येष्ठ नागरिकही याठिकाणी गायन व वादनाचे धडे घेत आहेत. या विद्यार्थ्यांना शिकविण्यासाठी आठ शिक्षक विविध विभागांत नेमण्यात आले आहेत. मात्र, अकादमीचे व्यवस्थापकपद गेल्या वर्षभराहून अधिक काळ रिक्त आहे. त्यामुळे, नवीन शिक्षकांच्या भरतीसोबतच व्यवस्थापकाची जागाही भरण्यात यावी, अशी मागणी केली जात आहे.

अकादमीसाठी लिफ्टचे काम सुरु असून आम्ही याबाबत स्थापत्य विभागाकडे वारंवार पाठपुरावा करत आहोत. अकादमीला व्यवस्थापक नसले तरी क्रीडा पर्यवेक्षक व क्रीडा अधिकारी हे अकादमीचे काम पाहत आहेत. त्यांचे काम योग्य पद्धतीने सुरू आहे.
- पंकज पाटील, सहायक आयुक्त, क्रीडा विभाग