सकाळ वृत्तसेवा
पिंपरी, ता. ४ : स्वारगेट येथील अत्याचाराच्या घटनेनंतर एसटी बसस्थानक परिसरातील कालबाह्य जुन्या बसगाड्यांची विल्हेवाट लावण्याचे आदेश परिवहनमंत्री प्रताप सरनाईक यांनी दिले होते. त्यानंतर चार शिवशाही बसगाड्या दापोडीच्या मध्यवर्ती कार्यशाळेत आणण्यात आल्या आहेत. या बस खासगी ठेकेदाराच्या असून, अनेक वर्षांपासून त्याची निगराणी एसटी महामंडळच करत होते.
एसटी महामंडळाच्या ताफ्यातील ७९२ ‘शिवशाही’ बसगाड्यांपैकी बहुतांश खासगी ठेकेदाराच्या आहेत. तर, काही ‘शिवशाही’ राज्यातील विविध आगारांत बंद अवस्थेत आहेत. स्वारगेट आगारातही अनेक वर्षांपासून अशा चार बसगाड्या बंद अवस्थेत होत्या. दरम्यान, स्वारगेट येथील अत्याचाराच्या घटनेनंतर पोलिसांनी आगारातील कालबाह्य बसगाड्यांची तपासणी केली. तेव्हा त्यात आक्षेपार्ह वस्तू आढळल्या होत्या. त्यामुळे ते एसटी स्थानक आहे, की अवैध कामांचे ठिकाण असा प्रश्‍न उपस्थित झाला होता. या घटनेनंतर सरनाईक यांनी कालबाह्य बसगाड्यांच्या विल्हेवाटीचे आदेश दिले. त्यानंतर पुणे एसटी विभागाने स्वारगेट येथील जुन्या शिवशाही बसगाड्या दापोडी येथे आणल्या आहेत. आता या बस आणखी किती दिवस पडून राहणार, असा प्रश्‍न उपस्थित होत आहे.
---------
प्रवासी सुरक्षेच्या दृष्टीने स्वारगेट आगारातील शिवशाही बस दापोडी कार्यशाळेत नेण्याचा निर्णय घेतला आहे. या बसगाड्या ठेकेदाराच्या असल्या, तरी आरटीओची सर्व कार्यवाही पूर्ण झाल्यानंतर त्यांचा लिलाव केला जाईल.
- प्रमोद नेहूल, विभाग नियंत्रक, पुणे