पिंपरी, ता. ७ ः महापालिकेने शनिवारी (ता. ८) आणि रविवारी (ता. ९) सकाळी आठ ते रात्री नऊ वाजेपर्यंत पिंपरी कॅम्पातील साई चौक ते महर्षी वाल्मिकी चौक परिसरात पहिला वाहनमुक्त दिवस आयोजित केला आहे. त्यात सहभागी होऊन नागरिकांना विविध खेळ खेळता येणार आहेत. झुंबा, लाईव्ह संगीत, पथनाट्य, नृत्यप्रदर्शन आणि खाणा-खजाना असे कार्यक्रम होणार असून, त्यांचा आनंद घेण्याचे आवाहन महापालिका आयुक्त शेखर सिंह यांनी केले आहे.
वाहनमुक्त दिनानिमित्त आयोजित उपक्रमाचे उद्‍घाटन शनिवारी (ता. ८) सकाळी आठ वाजता महापालिका आयुक्त तथा प्रशासक शेखर सिंह यांच्या हस्ते होईल. केंद्रीय राज्यमंत्री मुरलीधर मोहोळ, उपमुख्यमंत्री अजित पवार उपस्थित असतील. वाहनमुक्त दिनानिमित्त संपूर्ण पिंपरी कॅम्प सुशोभित केला आहे. मोकळ्या रस्त्यांचा मुक्त आनंद नागरिकांना घेण्याची संधी आहे. पादचारी व सायकलस्वारांसाठी पूरक वातावरण निर्मिती करणे, पर्यावरणाचे संतुलन राखणे आणि प्रदूषण मुक्तीसाठी जनजागृती करण्यासाठी उपक्रम उपयुक्त ठरणार आहे. याद्वारे नागरिक, विक्रेते व व्यावसायिकांच्या प्रतिक्रिया, सर्वेक्षण व चर्चांद्वारे भविष्यातील आराखडा तयार केला जाणार आहे.

आज विविध कार्यक्रम
रस्ते सुरक्षा, कमी प्रदूषण क्षेत्र, पादचारी मार्ग व सायकल ट्रॅकचे महत्त्व, सार्वजनिक वाहतूक आणि नागरिकांच्या सहभागावर चर्चासत्रांचे आयोजन, विविध मनोरंजनात्मक उपक्रम, कार्यक्रमस्थळी संपूर्ण ५०० मीटर रस्त्यावर उन्हापासून बचाव करण्यासाठी मंडप, सार्वजनिक शौचालये आणि विश्रांतीसाठी स्वतंत्र व्यवस्था, झुंबा, हास्ययोग, लाईव्ह संगीत, पथनाट्य, नृत्यप्रदर्शन, खेळ असे उपक्रम. महिला दिनानिमित्त नृत्यप्रदर्शन, खेळ पैठणीचा, लाईव्ह संगीत, प्रश्नमंजूषा व अन्य मनोरंजनात्मक उपक्रम.

‘चाय पे चर्चा’...
‘चाय पे चर्चा’ कार्यक्रमात माजी नगरसेवक, पोलिस अधिकारी व नागरिक थेट संवाद साधतील. सार्वजनिक वाहतुकीस चालना देण्यासाठी नागरिकांमध्ये जनजागृती केली जाणार आहे. चारचाकी, दुचाकी आणि इतर वाहनांसाठी पार्किंगची स्वतंत्र व्यवस्था आहे.

वाहतूक मार्गात बदल
शगुन चौक येथे उड्डाणपुलावरून येणाऱ्या वाहनांसाठी केवळ डावीकडे वळण्याची परवानगी असेल. एमजी रोड रहिवाशांसाठी मर्यादित वेळेसाठी खुला राहील.
शगुन चौक ते रिव्हर रोडकडे येणाऱ्या वाहनांनी डीलक्स चौकातून यू-टर्न घेऊन पुढे मार्गस्थ व्हावे. वाहनांसाठी सशुल्क पार्किंग सुविधा आहे.
---