सोमाटणे, ता. ९ ः जुन्या ऊर्से टोलनाक्यावरील वाहनास अडथळा ठरणारे शेड, टोलबुथ व बांधकामासह सर्व राडारोडा हटवणे गरजेचे होते. परंतु, रस्ते विकास महामंडळाकडून राडारोडा न हटवल्याने येथे अपघात होण्याचे प्रकार सुरू होते. याबाबतचे वृत ‘सकाळ’मध्ये प्रकाशित झाल्यानंतर राडारोडा हटवण्याचे काम वेगाने सुरू झाले आहे.
टोलनाक्यावरील होणारी वाहतूक कोंडी टाळण्यासाठी रस्ते विकास महामंडळाच्या वतीने जुना उर्से टोलनाका हा मुंबई दिशेला दोन किलोमीटर अंतरावर स्थलांतरित करून टोलबुथची संख्या चौदावरून अठ्ठावीस करण्यात आली. टोलनाका स्थलांतरित केल्यानंतर जुन्या उर्से टोलनाक्याचे वाहनास अडथळा ठरणारे शेड, टोलबूथ व बांधकामासह सर्व राडारोडा हटवणे गरजेचे होते. परंतु, रस्ते विकास महामंडळाने टोलचा राडारोडा न हटवल्याने दोन्ही बाजूने वेगात आलेल्या अनेक वाहनचालकांना अचानक रस्त्यालगतचा राडारोडा दिसत असल्याने वाहनावरील नियंत्रण सुटून अपघात होण्याचे प्रकार होत होते. याबाबतचे वृत ‘सकाळ’मध्ये प्रसिद्ध झाल्यानंतर रस्ते विकास महामंडळाने दखल घेऊन जुन्या उर्से टोलनाक्यावरील राडारोडा हटवण्याचे काम वेगाने सुरू केले आहे. सध्या बूथचे बांधकाम, लोखंडी संरक्षक कठडे व बाजूचे अॅंगल हटवण्यात आले आहे. एक महिन्यात सर्व राडारोडा हटवण्याचे काम पूर्ण होणार आहे.

PNE25U96214
---