सकाळ वृत्तसेवा
पिंपरी, ता. १४ : महावितरणच्या पिंपरी विभागातील गणेशम् स्विचिंग स्टेशन व म्हाडा उपकेंद्रांना आयएसओ मानांकन मिळाले. मोरवाडी येथे आयोजित कार्यक्रमात मंगळवारी (ता. ११) या दोन्ही उपकेंद्रांना मुख्य अभियंता राजेंद्र पवार व ‘आयएसओ’चे परीक्षक नंदकुमार देशमुख यांच्याहस्ते मानांकनाचे प्रमाणपत्र प्रदान करण्यात आले.
यावेळी अधीक्षक अभियंता सिंहाजीराव गायकवाड, कार्यकारी अभियंता सोमनाथ मुंडे उपस्थित होते.
‘आयएसओ’च्या पथकांनी या दोन्ही उपकेंद्रांना नुकतीच भेट दिली. यावेळी २७ अटी व शर्तींच्या मानकांप्रमाणे तपासणी करुन उपकेंद्रांची गुणवत्ता, कामकाजाचा दर्जा, सर्व प्रकारची सुरक्षा उपाययोजना व उपकरणांची उपलब्धता, पर्यावरण दस्ताऐवजीकरण, वैद्यकीय सुविधा, सुशोभीकरण आदी निकषांच्या आधारे दोन्ही उपकेंद्राना मानांकन दिले. आतापर्यंत पुणे परिमंडलातील नऊ उपकेंद्रांनी ‘आयएसओ’चे प्रमाणपत्र मिळविले आहे. या उपकेंद्रांच्या आधुनिकीकरणासोबतच त्याची योग्य निगा, दर्जा व व गुणवत्ता अबाधित ठेवण्याचे निर्देश पवार यांनी दिले.