पिंपरी, ता. १२ ः पिंपरी-चिंचवड शहर आणि परिसरात धुळीचे साम्राज्य आणि हवा प्रदूषणामुळे सर्वसामान्य नागरिक, वाहनचालक यांना प्रचंड त्रास सहन करावा लागत आहे. या पार्श्वभूमीवर राज्याच्या पर्यावरण मंत्री पंकजा मुंडे यांच्या उपस्थितीमध्ये उच्चाधिकार समितीची बैठक घ्यावी. तसेच हवा प्रदूषणाबाबत ठोस उपाययोजना कराव्यात, अशी मागणी भोसरीचे आमदार महेश लांडगे यांनी केली.
राज्य विधिमंडळाच्या अर्थसंकल्पीय अधिवेशनाच्या पार्श्वभूमीवर आमदार लांडगे यांनी मुंडे यांना निवेदन दिले. त्यामध्ये म्हटले आहे की, काही दिवसांपूर्वी, पुणे, पिंपरी-चिंचवड परिसरातील सोसायटीधारकांनी रस्त्यावर उतरून मूक मोर्चा काढून हवा प्रदूषणाबाबत राज्य सरकारचे लक्ष वेधले आहे. सिमेंट मिश्रित धूळ त्वरित बंद व्हावी. वाढत्या प्रदूषणावर नियंत्रण ठेवण्यासाठी कडक नियम आणि उपाय योजना लागू कराव्यात. वायू प्रदूषण पातळीची नियमित तपासणी करून त्याबाबतचा अहवाल सार्वजनिक करावा. प्रदूषणामुळे नागरिकांच्या आरोग्यावर होणाऱ्या परिणामांचा अभ्यास करून आवश्यक ती आरोग्य सेवा पुरवावी. रस्त्यांवरील झाडांची नियमित देखभाल करावी, यासाठी संबंधित विभागाचे अधिकारी, स्थानिक स्वराज्य संस्था यांना आदेश द्यावेत, अशी मागणीही आमदार लांडगे यांनी केली.

हवा गुणवत्ता निर्देशांक चिंताजनक...
पिंपरी-चिंचवडमध्ये हवामान खात्याच्या आकडेवारीनुसार बुधवारी (ता. १२) गवळीनगर १२७, पार्क स्ट्रीट वाकड १४०, थेरगाव १२७, भोसरी २६०, भूमकरनगर २७१, ट्रान्सपोर्टनगर निगडी १४० असा हवा गुणवत्ता निर्देशांक होता. मानवी आरोग्यासाठी किंवा निसर्ग परिसंस्थेसाठी ० ते ५० असा हवा गुणवत्ता निर्देशांक चांगला मानला जातो. ० ते १०० पर्यंत मध्यम आणि १०० ते २०० पर्यंतचा हवा गुणवत्ता निर्देशांक म्हणजे नागरी आरोग्यावर वाईट परिणाम करणारा आहे. पिंपरी-चिंचवड शहरात एकाही ठिकाणी हवा गुणवत्ता निर्देशांक ५० पेक्षा कमी नाही, ही बाब चिंताजनक आहे.

पिंपरी-चिंचवड, पुणे परिसरातील हवा प्रदूषणाला प्रतिबंध करण्यासाठी ठोस उपाययोजना आणि नियमांमध्ये सुधारणा करण्याची आवश्यकता असून त्या दृष्टीने पर्यावरण विभागाची उच्चाधिकार समितीची बैठक नियोजित करावी. त्यामध्ये स्थानिक स्वराज्य संस्थांच्या प्रमुख अधिकाऱ्यांसह लोकप्रतिनिधी यांना सूचना मांडण्याची संधी मिळावी. यावर पर्यावरण विभागाच्यावतीने सकारात्मक कार्यवाही होईल, अशी अपेक्षा आहे.
- महेश लांडगे, आमदार, भोसरी विधानसभा