पिंपरी, ता. ४ : पिंपरी, चिंचवडसह शहर-उपनगरांतील विविध भागांत गणपती दर्शनासाठी आणि देखावे पाहण्यासाठी नागरिकांची गर्दी उसळली होती. सध्या दीड, पाच आणि सात दिवसांच्या गणपतीसह गौराईंचेही विसर्जन झाले आहे. तर, उद्योगनगरीतील कंपन्यांना गुरुवारी सार्वजनिक सुट्टी होती. याचा उपयोग करत गणेशभक्त सहकुटुंब दर्शनासाठी आणि देखावे पाहण्यासाठी बाहेर पडले होते. बहुतांश रस्ते गणेशभक्तांच्या गर्दीने गुरुवारी (ता.४) रात्री उशिरापर्यंत फुलले होते.

शहरात दोन हजारांहून अधिक सार्वजनिक मंडळांनी गणपतीची प्रतिष्ठापना केली आहे. ठिकठिकाणी भव्य सभामंडप, विद्युत रोषणाई, सांस्कृतिक कार्यक्रम तसेच पौराणिक व सद्यस्थितीवर आधारित देखावे उभारण्यात आले आहेत. यंदाही गणेश मंडळांनी भव्य-दिव्य देखाव्यांची परंपरा कायम ठेवली आहे. त्याला मोठा प्रतिसाद मिळत आहे. गुरुवारी उद्योगनगरीसह चाकण, तळेगाव एमआयडीसीतील कंपन्यांना सुट्टी होती. तर, शुक्रवार-शनिवार-रविवार अशी शाळांना सुटी आली आहे. त्यामुळे दुपारनंतर गर्दीत भर पडली आणि रात्रीपर्यंत सर्वच प्रमुख रस्ते फुललेले दिसले. जिवंत देखावे पाहण्यास नागरिकांनी पसंती दिली. तसेच विद्युत रोषणाई, पौराणिक देखावे पाहण्यासाठी गर्दी उसळली होती. ऐतिहासिक देखावे पाहताना तरुणाईकडून घोषणा, ओरडून प्रतिसाद देण्यात येत होता. गणेश मंडळांभोवती खाद्यपदार्थ, खेळणीसह विविध साहित्य विक्रेत्यांनी स्टॉल मांडले होते. तेथेही गर्दी दिसून आली. त्यामुळे आर्थिक उलाढाल झाल्याने विक्रेत्यांच्या चेहऱ्यावर समाधान दिसून आले.

मेट्रो, पीएमपीला गर्दी
उपनगरांसह ग्रामीण भागातून नागरिक पिंपरी-चिंचवड शहरात आणि विशेषत: पुण्यात जात होते. उपनगरांतून दोन्ही शहरांत येणाऱ्या पीएमपी बसमध्ये गर्दी होती. सायंकाळनंतर ती वाढत गेली. मेट्रो प्रवाशांची संख्याही मोठी होती. प्रवाशांच्या सोयीसाठी सकाळी सहा वाजता सुरू झालेली मेट्रोची सेवा रात्री दोन वाजेपर्यंत सुरू ठेवण्यात आली. त्यामुळे भाविकांना दिलासा मिळाला.
----------