पिंपरी, ता. ४ : गणेश विसर्जन मिरवणूक शांततेत पार पडाव्यात, कायदा - सुव्यवस्था कायम राहावी, यासाठी पिंपरी-चिंचवड पोलिसांनी चोख नियोजन केले आहे. सुमारे तीन हजार पोलिसांचा तगडा बंदोबस्त तैनात राहणार आहे. त्यामध्ये १७ शीघ्र कृती पथके, सहा दंगल नियंत्रक तर दोन राज्य राखीव पोलिस दलाच्या पथकांचा समावेश असणार आहे.
पोलिस आयुक्तालय हद्दीत एकूण दोन हजार १४६ सार्वजनिक गणपतींची स्थापना झाली आहे. त्यापैकी सांगवी, तळेगाव दाभाडे यासह काही भागांतील सार्वजनिक गणेश मंडळांच्या मूर्तींचे विसर्जन झाले आहे. भोसरीतील परिसरातील सार्वजनिक गणेश मंडळांचे शुक्रवारी तर इतर भागांतील मंडळांच्या गणेश मूर्तींचे विसर्जन शनिवारी होत आहे. विसर्जन मिरवणुका शांततेत पार पडाव्यात यासाठी पोलिसांनी नियोजन केले आहे.
हद्दीतील सर्व विसर्जन मार्ग व विसर्जन घाट, स्थळे यांना पोलिस अधिकाऱ्यांनी महापालिका, महावितरण व इतर संबंधित शासकीय अधिकारी यांच्यासह संयुक्त भेटी देऊन पाहणी केली आहे. पोलिसांकडून ध्वनी प्रदूषण रोखण्यासाठीही नियोजन केले आहे. ध्वनीची तीव्रता मोजण्यासाठी सर्व पोलिस ठाण्यांना ध्वनी पातळी मापक यंत्र (नॉइज लेवल मीटर) पुरविले आहेत. उत्सव कालावधीत त्याद्वारे मोजमाप करुन संबंधितांवर योग्य ती कायदेशीर कारवाई करण्यात येणार आहे, असे पोलिसांनी सांगितले.

असा असेल बंदोबस्त
सह आयुक्त - १
अपर आयुक्त- १
उपायुक्त - ६
सहायक आयुक्त - ६
पोलिस निरीक्षक - ६४
सहायक निरीक्षक, उपनिरीक्षक - २९१
अंमलदार - २ हजार ३५५
होमगार्ड - ४००
बॉम्ब शोधक व नाशक पथक - एक
शीघ्र कृती पथके - १७
दंगल नियंत्रक पथके - ६
राज्य राखीव पोलिस दल - २