पिंपरी, ता. १० ः शालेय विद्यार्थी वाहतूक करणाऱ्या वाहन चालकांनी सुरक्षित आणि नियमांचे पालन करुनच वाहन चालवावे. तसेच विद्यार्थी वाहतूक करणाऱ्या वाहनांची सर्व कागदपत्रे अद्ययावत ठेऊन वाहनांची नियमित तपासणी करावी, असे आवाहन मोटार वाहन निरीक्षक विजय महाजन यांनी केले.
निगडी येथील मॉडर्न हायस्कूलमध्ये मराठी आणि इंग्रजी माध्यमाच्या शालेय परिवहन समितीच्या सभेत ते बोलत होते. यावेळी प्राचार्या शारदा साबळे, इंग्रजी माध्यमाच्या मुख्याध्यापिका गौरी सावंत, प्राथमिकचे मुख्याध्यापक पांडुरंग मराडे, इंग्रजी माध्यम प्राथमिक विभाग मुख्याध्यापिका तृप्ती वंजारे, पर्यवेक्षक विजय पाचारणे, शिवाजी अंबिके, दिलीप गुंड, नरेश कांबळे उपस्थित होते. या सभेत शालेय बसचालकांना महाजन यांनी विद्यार्थी वाहतुकीच्या सर्व नियमांची माहिती दिली. त्यामध्ये विद्यार्थी बसण्याचे-उतरण्याचे ठिकाण, बस चालकाचा बॅच, चारित्र्य पडताळणी प्रमाणपत्र, बसमध्ये साईड बार, अग्निविरोधी उपकरण, प्रथमोपचार पेटी, दप्तरासाठी जागा, महिला मदतनीस, आपत्कालीन बाहेर पडण्याचा मार्ग आदी विविध बाबींची आवश्यकता सांगितली. संस्थेचे कार्याध्यक्ष डॉ.गजानन एकबोटे, कार्यवाह प्रा.श्यामकांत देशमुख, सहकार्यवाह प्रा.डॉ.ज्योत्स्ना एकबोटे, उपकार्यवाह डॉ.प्रा.निवेदिता एकबोटे, शाळा समिती अध्यक्ष प्रा.मानसिंग साळुंके यांनी या उपक्रमाचे कौतुक केले.