पिंपरी, ता. २६ : महापालिकेच्या कर आकारणी व संकलन विभागामार्फत शहरातील मालमत्ता कर थकबाकीदारांना थकीत रक्कम भरण्याबाबत यापूर्वीच जप्तीपूर्वीची अंतिम नोटीस बजावण्यात आली आहे. आता चालू आर्थिक वर्षाच्या मालमत्ता कराच्या बिलासोबतच अंतिम जप्तीपूर्व नोटीस वाटप सुरू आहे. यामुळे आता थकबाकीदारांवर थेट जप्तीची कारवाई करून मालमत्तेचा लिलाव काढण्यात येणार आहे.
शहरातील मालमत्ताधारकांना चालू वर्षाची मालमत्ता कराची बिले वाटप सुरू आहेत. मागील आर्थिक वर्षात मालमत्ता कर भरण्याची अंतिम मुदत पहिल्या सहामाहीसाठी ३० सप्टेंबर आणि दुसऱ्या सहामाहीसाठी ३१ डिसेंबर अशी होती. तरी, तब्बल ७१ हजार ९९९ थकबाकीदारांनी निर्धारित वेळेत कर भरला नाही. त्यामुळे या थकबाकीदारांवर प्रत्येक महिन्यासाठी दोन टक्के शास्ती (दंड) लागू करण्यात आला आहे. संपूर्ण थकबाकी भरेपर्यंत शास्ती लागू राहणार आहे. अशा थकबाकीदारांना चालू वर्षाच्या बिलासोबत अंतिम जप्तीपूर्व नोटीस वाटपाचे काम सुरू आहे.
मार्च २०२५ पूर्वीची मालमत्ता कर बिलाची थकबाकी असणाऱ्या ७१ हजार ९९९ थकबाकीधारकांना नोटीस प्राप्त झाल्यानंतर केवळ सात दिवसांची अंतिम मुदत देण्यात येणार आहे. मालमत्ता थकबाकीदारांना महापालिकेच्या अधिकृत संकेतस्थळावरून (www.pcmcindia.gov.in) ऑनलाइन पेमेंट गेटवे, RTGS, BBPS किंवा विभागीय कार्यालयांतील थेट भरणा केंद्रांद्वारे रक्कम भरता येईल. आर्थिक अथवा अन्य कारणास्तव कर भरता न आल्यास समाधानकारक कारण लेखी स्वरूपात सात दिवसांत महापालिकेस सादर करणे आवश्यक आहे.

‘‘महापालिकेच्या महसुलामधून शहरातील पायाभूत सेवा, रस्ते, उद्याने, कचरा व्यवस्थापन, पाणीपुरवठा, आरोग्य सुविधा यांचे संचालन व विकासकार्य चालते. त्यामुळे प्रत्येक करदात्याची जबाबदारी आहे की, त्यांनी वेळेत व नियमित कराचा भरणा करावा. ही अंतिम संधी लक्षात घेऊन तत्काळ थकबाकी भरावी आणि जप्तीची कारवाई टाळावी.
- अविनाश शिंदे, सहाय्यक आयुक्त, पिंपरी-चिंचवड महापालिका
---