सोमाटणे, ता. २६ : उन्हाच्या तीव्रतेमुळे पवना नदी आणि परिसरातील बंधाऱ्यांवर पोहण्यासाठी येणाऱ्यांची संख्या वाढत आहे. मात्र, पोहताना काळजी घेण्याची गरज आहे.
मार्चपासून वाढलेल्या उष्णतेमुळे तरुणाईची पावले पोहण्यासाठी पवना नदी व नदीवरील बंधाऱ्याकडे वळत आहेत. परंतु, थोड्याशा निष्काळजीपणाने जिवावर बेतू शकते, हे लक्षात घेऊन लहान मुलांबरोबर पालकांनीही नदी, बंधाऱ्यावर पोहण्यासाठी जाताना योग्य सुरक्षा साधने जवळ घेऊन दक्षता पाळण्याची गरज आहे. त्यातच सध्या शाळांना सुट्टी, गावोगावी यात्रा असल्याने पाहुण्यांचा ओघ अधिक असून, दुपारच्या वेळी थंड पाण्यातील पोहण्याचा आनंद लुटण्यासाठी पाहुणे कासारसाई व पवना नदीवरील पोहण्याचे ठिकाण असलेल्या सांगवडे, गहुंजे, शिरगाव, सोमाटणे, धामणे, परंदवडी, बेबडओहोळ, शिवणे, थुगाव, कडधे, शिवली, कोथुर्णे येथील बंधाऱ्यावर गर्दी करत आहेत. मात्र, काही ठिकाणी खोल खड्डे, शेवाळ, झाडांची मुळे, तसेच धरणातून सोडले जाणारे पाणी यामुळे पाण्याचा प्रवाह अचानक वाढतो आणि त्यातून अपघाताची शक्यता अधिक असते. गेल्या काही वर्षांत नदीपात्रात अशा अनेक दुर्घटना घडल्या आहेत.

‘‘सध्या तापमान जास्त असल्याने मुलांसह पालकही पोहण्यासाठी येत आहेत. मात्र, प्रत्येकाने आपल्या मुलांकडे लक्ष ठेवणे गरजेचे आहे.’’
- राजेश मुऱ्हे, माजी सरपंच

‘‘कासारसाई धरण परिसरात पोहण्यास बंदी आहे. गर्दीच्या दिवशी आमचे कर्मचारी लक्ष ठेवतात.’’
- अमर धायगुडे, शाखा अभियंता

‘‘धोकादायक ठिकाणी सूचना फलक लावले असून, अशा ठिकाणी कोणीही पोहण्यासाठी जाऊ नये.’’
- तेजस्विनी कदम, वरिष्ठ पोलिस निरीक्षक, शिरगाव
---