वेश्या व्यवसायप्रकरणी महिलेवर गुन्हा
पिंपरी : परदेशी महिलेकडून वेश्याव्यवसाय करवून घेणाऱ्या एका महिलेवर पोलिसांच्या गुन्हे शाखेच्या अनैतिक मानवी वाहतूक प्रतिबंधक कक्षाच्या पथकाने कारवाई केली. ही कारवाई जुन्या सांगवीतील राधानगर येथील प्रज्ञा इमारतीत करण्यात आली. या आरोपी महिलेने एका परदेशी महिलेस पैशांचे आमिष दाखवून तिला वेश्या व्यवसायासाठी प्रवृत्त केले. तिच्याकडून वेश्याव्यवसाय करवून घेऊन त्यातून मिळालेल्या रकमेतून स्वतःची उपजीविका भागवली. आरोपी महिलेकडून सात हजार ७८० रुपये किमतीचा मुद्देमाल जप्त करण्यात आला.

भरधाव मोटारीच्या धडकेत दुचाकीस्वार जखमी
पिंपरी : भरधाव मोटारीने दिलेल्या धडकेत दुचाकीस्वार गंभीर जखमी झाला. ही घटना मोशी टोलनाका रस्त्यावर घडली. सुभाष शंभूनाथ रॉय (रा. साने चौक, चिखली) असे या अपघातात जखमी झालेल्या दुचाकीस्वाराचे नाव आहे. त्यांनी या प्रकरणी एमआयडीसी भोसरी पोलिस ठाण्यात फिर्याद दिली आहे. त्यानुसार पोलिसांनी अज्ञात मोटार चालकावर गुन्हा दाखल केला आहे. फिर्यादी हे त्यांच्या मित्राला भेटण्यासाठी पुणे-नाशिक महामार्गाने त्यांच्या दुचाकीवरून जात होते. दरम्यान, मोशी टोलनाका येथे एका भरधाव मोटारीने त्यांच्या दुचाकीला जोरात धडक दिली. यामध्ये त्यांच्या पायाला गंभीर दुखापत झाली. तसेच दुचाकीचेही नुकसान झाले.