पिंपरी, ता. २८ ः ‘दि युनायटेड पास्टर्स अँड लीडर्स ट्रस्ट’ व ‘गुड समॅरीटन ग्रुप’ यांच्या संयुक्त विद्यमाने ‘सत्य’ या नाताळ विशेषांकाचे सुहासिनी फरांदे, कवयित्री सुलोचना इंगळे, लेखिका सरिता साळवी, वनिता पिल्ले, गीता भोसले यांच्या हस्ते प्रकाशन करण्यात आले.
भोसले यांनी ग्रुपच्या सर्व सदस्यांना नाताळ व नव वर्षाच्या शुभेच्छा दिल्या. पिंपरीतील ‘जिजस् कॉल्स’ येथे हा कार्यक्रम पार पडला. या प्रसंगी कार्यकारी संपादक बन्यामीन काळे, कुशल सोज्वळ आदी उपस्थित होते. या वर्षीचा अंक महिला विशेषांक आहे, त्यामुळे महाराष्ट्रातून विविध भागातील महिलांना लेख लिहिण्यास प्रोत्साहन देत, महिलांच्या हस्ते प्रकाशन करून हा अंक समाजातील तेजस्वी कर्तृत्ववान महिलांना समर्पित करीत असल्याची प्रतिक्रिया विशेषांकाचे संपादक डेव्हिड काळे यांनी दिली.
या अंकात प्रभू येशूच्या विविध कार्यावर आणि उपनामावर प्रकाश टाकण्यात आला आहे, असे प्रतिपादन सॅमसन चोपडे यांनी केले. फरांदे यांनी महिलांना विशेष स्थान देत या अंकाने महिलांना उत्तेजन देऊन नाताळचा आनंद द्विगुणित केला, अशी प्रतिक्रिया दिली.