पिंपरी, ता. २९ ः महापालिका निवडणुकीतील उमेदवारांच्या प्रचारासाठी प्रसारित होणाऱ्या इलेक्ट्रॉनिक जाहिराती, सोशल मीडियावरील प्रचार, तसेच इतर इलेक्ट्रॉनिक माध्यमांमधील जाहिरातींसाठी पूर्वप्रमाणन करणे बंधनकारक आहे. यासाठी उमेदवारी अर्ज दाखल केलेल्या सर्व उमेदवारांनी पिंपरी येथील मुख्य प्रशासकीय भवनातील प्रसार माध्यम प्रमाणन व संनियंत्रण समिती कार्यालयाकडे अर्ज सादर करणे बंधनकारक आहे.
निवडणूक काळात आचारसंहितेचा भंग करणाऱ्या जाहिराती प्रसारित केल्या जाऊ नयेत, यासाठी प्रसार माध्यम व संनियंत्रण समिती अतिरिक्त आयुक्त तृप्ती सांडभोर यांच्या अध्यक्षतेखाली कार्यरत आहे. कोणतीही जाहिरात समितीच्या पूर्वप्रमाणनाशिवाय प्रसारित करू नये. राज्य निवडणूक आयोगाच्या सूचनांचे तंतोतंत पालन करावे, असे आवाहन समितीने केले आहे.
जाहिरात प्रसारित करण्यासाठी अर्जाचा नमुना व आवश्यक कागदपत्रांची माहिती महापालिकेच्या संकेतस्थळावर तसेच क्यूआर कोडद्वारे उपलब्ध आहे. संबंधित क्यूआर कोड सर्व निवडणूक निर्णय अधिकारी कार्यालयांमध्ये बॅनर स्वरूपात लावलेले आहेत. समितीने जाहिरातीत सुचवलेले बदल, दुरुस्त्या किंवा वगळणे उमेदवार किंवा संबंधित राजकीय पक्षावर बंधनकारक राहतील. पूर्वप्रमाणन मंजूर झाल्यानंतर अधिकृत प्रमाणपत्र देण्यात येईल, असेही समितीने कळविले आहे.
---