पिंपरी, ता. ३० ः सातारा येथे १ ते ४ जानेवारी दरम्यान होणाऱ्या ९९ व्या अखिल भारतीय मराठी साहित्य संमेलनात कविकट्टा या लोकप्रिय व्यासपीठाचे प्रतिनिधित्व महाराष्ट्र साहित्य परिषद पिंपरी चिंचवड शाखा करणार आहे. शाखेचे अध्यक्ष राजन लाखे प्रमुख असतील. त्यामुळे साहित्याच्या माध्यमातून पिंपरी चिंचवड शहराचे महत्त्व अखिल भारतीय पातळीवर अधोरेखित झाले आहे आणि पिंपरी चिंचवड साहित्य क्षेत्रासाठी ही मानाची बाब मानली जात आहे.
गुरुवारी (ता. १) सायंकाळी ४ वाजता कविकट्टयाचे उद्‍घाटन ज्येष्ठ उद्योगपती भालचंद्र जोशी यांच्या हस्ते होईल. यावेळी रवींद्र बेडकीहाळ, सातारा नगरपालिकेचे मुख्याधिकारी विनोद जळक, साहित्य महामंडळाचे अध्यक्ष प्रा. मिलिंद जोशी तसेच संमेलनाचे कार्याध्यक्ष विनोद कुलकर्णी उपस्थित राहणार आहेत.
या कविकट्ट्यासाठी महाराष्ट्राव्यतिरिक्त बृहन्महाराष्ट्रातील बंगळूर, हैदराबाद, गोवा, दमण , दिल्ली, बडोदा, अहमदाबाद, इंदूर येथून ७२ कविता, तर जपान आणि अबुधाबी येथून प्रत्येकी एक कविता आली आहे. महाराष्ट्र तसेच बृहन्महाराष्ट्रातून कवितांचा पाऊस पडला आहे. प्राप्त झालेल्या एकूण १७६२ कवितांमधून निवड झालेल्या ४५० कवींना आपली कविता कविकट्टयावर सादर करण्याची संधी मिळणार आहे. हे संमेलन चार दिवसांचे असून कविकट्टा एकूण २२ तास चालणार आहे.
-----