पिंपरी, ता. ३० : पिंपरी चिंचवड पोलिसांच्या गुन्हे शाखा युनिट चारच्या पथकाने चाकणमधील आंबेठाण चौकातून ३१ किलो गांजा जप्त केला. या कारवाईत तिघांना अटक करण्यात आली. काळू आधार मोहिते, तुषार संजय देसले, दुर्योधन भागचंद पवार (तिघेही रा. आर्वी, ता. जि. धुळे) अशी आरोपींची नावे आहेत. गस्त घालत पोलिसांना तिघे जण पाठीवर पिशवी घेऊन संशयास्पदरीत्या चालताना दिसले. पोलिसांचे सरकारी वाहन पाहून ते घाईघाईने पळून जाऊ लागले. पोलिसांनी पाठलाग करून झडती घेतली असता त्यामध्ये ३१ किलो वजनाचा व पंधरा लाख ५० हजार रुपये किमतीचा गांजा सापडला. आरोपींना न्यायालयाने दोन जानेवारीपर्यंत पोलिस कोठडी दिली आहे. या प्रकरणी चाकण उत्तर पोलिस ठाण्यात गुन्हा दाखल झाला आहे.
----