पिंपरी, ता. ६ : ‘‘निगडी येथील यशवंतराव चव्हाण स्मारक समितीच्या इमारतीच्या अपूर्ण बांधकामास आवश्यक तेवढा निधी उपलब्ध करून देणार आहे,’’ असे प्रतिपादन सार्वजनिक बांधकाम मंत्री शिवेंद्रराजे भोसले यांनी नुकतेच केले.
यशवंतराव चव्हाण स्मारक समिती, सातारा जिल्हा मित्र मंडळ, सांगली जिल्हा मित्र मंडळ, पश्चिम महाराष्ट्र युवा मंचाच्यावतीने निगडी येथे आयोजित सातारा-कोल्हापूर-सांगली-सोलापूरवासीयांच्या मेळाव्यामध्ये ते बोलत होते. यावेळी राष्ट्रवादी काँग्रेस शरदचंद्र पवार पक्षाचे आमदार शशिकांत शिंदे, आमदार शंकर जगताप, आमदार समाधान अवताडे, आमदार उमा खापरे आदी उपस्थित होते. या कार्यक्रमात विविध पुरस्‍कारांचे वितरण करण्यात आले. त्यामध्ये प्रशासकीय सेवेतील कार्याबाबत पन्‍हाळा येथील प्रांताधिकारी समीर शिंगटे यांना सातारा भूषण पुरस्कार प्रदान करण्यात आला.‍ विश्वचषक विजेत्या रोलबॉल संघाची कर्णधार प्रांजल जाधवला सांगली भूषण पुरस्काराने तर औद्योगिक क्षेत्रातील कार्याबाबत व्हीटोम क्रेन्स प्रायव्‍हेट लिमिटेडचे संचालक विजय पाटील यांना कोल्हापूर भूषण पुरस्कार प्रदान करण्यात आला. औद्योगिक क्षेत्रातील कार्याबाबत लुब्रॉल इंडस्ट्रीज प्रायव्‍हेट लिमिटेडचे व्‍यवस्‍थापकीय संचालक जोतीराम जगताप यांना सोलापूर भूषण प्रदान करण्यात आला. तसेच बांधकाम व्यवसाय क्षेत्रातील कार्याबाबत इंटेरिअर डिझाईनर हर्षाली डेरे-भोर यांना पिंपरी चिंचवड भूषण पुरस्काराने गौरविण्यात आले.
यशवंतराव चव्हाण स्मारक समितीचे अध्यक्ष सुनील जाधव यांनी प्रास्ताविक केले. अशोक पाटील, गोपीचंद जगताप, शिरीष पाटील, अशोक चव्हाण, जितेंद्र पवार, धनंजय सावंत, संजय कदम, संदीप चव्हाण, राजाराम सावंत, किशोर कदम, संतोष जगताप, विलास भोसले, रामभाऊ तावरे आदींनी संयोजन केले.