पिंपरी, ता. ६ ः गेल्या काही दिवसांपासून पावसाने विश्रांती घेतल्याने पुणे महानगर प्रदेश विकास प्राधिकरणाकडून (पीएमआरडीए) हिंजवडीतील रस्त्यांच्या दुरुस्तीचे काम अखेर हाती घेण्यात आले आहे. पीएमआरडीएने मेट्रो मार्गिकेखालील रस्त्यांचे काम हाती घेण्याच्या सूचना संबंधित कंपनीला दिल्या असून इतर भागांतील रस्तेही दुरुस्त केले जात आहेत.
दरवर्षी पावसाळ्यात हिंजवडीत खराब रस्ते व त्यामुळे होणारी वाहतूक कोंडी ही समस्या उद्‍भवत असते. यावर्षी पावसाळ्याच्या सुरुवातीलाच झालेल्या जलकोंडीमुळे प्रशासनावर मोठी टीका झाली. त्यानंतर सोशल मीडियाच्या माध्यमातून येथील रस्ते व विविध पायाभूत समस्यांवर वारंवार चर्चा झाली. त्याची दखल घेत मुख्यमंत्री देवेंद्र फडणवीस यांनी गेल्या महिन्यात हिंजवडीतील समस्या तातडीने सोडविण्याच्या सूचना केल्या. उपमुख्यमंत्री अजित पवार यांनीही दोन वेळा आयटी पार्कला भेट देऊन पाहणी केली. त्यानंतर अतिक्रमणे काढणे, नाले साफ करणे यासारखी कार्यवाही केली जात होती. मात्र, पाऊस पडत असल्याने प्रशासकीय यंत्रणांकडून रस्ते दुरुस्त करण्याचे काम हाती घेण्यात आले नव्हते. गेल्या काही दिवसांपासून हे काम हाती घेण्यात आले असून पहिल्यांदा मेट्रो मार्गिकेखालील रस्त्यांवरील खड्डे बुजविले जात आहेत. तसेच पीएमआरडीएच्या अंतर्गत येणाऱ्या इतर रस्त्यांचीही डागडुजी तसेच डांबरीकरणही केले जात आहे. ठिकठिकाणचे रस्ते बुजविण्याबरोबरच फेज १ ते फेज २ मुख्य रस्ता, म्हाळुंगे येथील रस्त्याचे कामही करण्यात येत आहे. आयटी कर्मचाऱ्यांनी त्यावर समाधान व्यक्त केले असून लवकरात लवकर नवीन रस्ते बांधणीवर भर द्यावा, अशीही मागणी समाज माध्यमांवर केली जात आहे.

सध्या पावसाने उघडीप दिल्याने खड्डे दुरुस्त करण्याचे काम युद्धपातळीवर हाती घेण्यात आले आहे. काही भागांत अतिक्रमणे काढण्याचेही सध्या काम सुरू असून ती कार्यवाही पूर्ण झाल्यानंतर संबंधित भागांतील रस्तेही दुरुस्त केले जातील. सध्या पाऊस नसल्याने जास्तीत जास्त दुरुस्तीची कामे पूर्ण करण्याचा प्रयत्न आहे.
- रीनाज पठाण, मुख्य अभियंता, पीएमआरडीए