पिंपरी, ता. ८ ः पिंपरी-चिंचवड महापालिका आणि टाटा स्ट्राईव्ह यांच्या वतीने राबवण्यात येणाऱ्या ‘सक्षमा’ प्रकल्पांतर्गत आयोजित करण्यात आलेले महिला आरोग्य तपासणी शिबिर यशस्वीरीत्या पार पडले. ‘ड’ प्रभागमधील आरंभ फेडरेशन स्वयंरोजगार महिला सहकारी संस्था मर्यादित यांच्या सहकार्याने आयोजित करण्यात आलेल्या या शिबिरामध्ये एकूण १८४ महिलांनी सहभाग घेतला. त्यामध्ये ९४ महिलांची स्त्रीरोग तपासणी, ६७ महिलांची हाडांची तपासणी, तर २३ महिलांची वैद्यकीय तपासणी करण्यात आली. कार्यक्रमाची सुरुवात दीपप्रज्वलनाने झाली. शकुंतला मदने यांनी महिला बचत गटांसाठी उपजीविकेच्या संधी स्पष्ट केल्या, तर वैशाली लगाडे यांनी समाज विकास विभागाच्या योजनांची माहिती दिली. टाटा स्ट्राईव्हच्या स्नेहल विचारे व प्रकल्प संचालक सचिन उपाध्ये यांनी ‘सक्षमा’ प्रकल्पाची माहिती दिली. समाजविकास विभागाच्या ममता शिंदे यांनी शिबिराचा आढावा घेतला.
---