लोगो : पीएमआरडीए

पिंपरी, ता. २५ : पुणे महानगर प्रदेश विकास प्राधिकरणांतर्गत (पीएमआरडीए) ग्रामीण भागासाठी प्रादेशिक आणि तालुकास्‍तरीय कार्यालयाला मंजुरी मिळाली आहे. त्‍यासाठी प्रशासनाकडून जागेची पाहणी केली जात आहे. ‘पीएमआरडीए’ची मोठी हद्द ही ग्रामीण भागात आहे. तेथील नागरिकांना कामानिमित्त आकुर्डी येथील मुख्य कार्यालय किंवा औंध येथील कार्यालयात यावे लागते. तसेच प्राधिकरण क्षेत्रातील भोर, राजगड, मावळ, मुळशी, खेड , हवेली, दौंड, पुरंदर आणि शिरूर या तालुक्यांतील सामान्य जनतेला मुख्य कार्यालय येथे हेलपाटे मारावे लागतात. त्यासाठी वेळ आणि पैसा खर्ची पडतो. हे लक्षात घेता, नागरिकांच्या सोयीसाठी पूर्व, पश्‍चिम, दक्षिण आणि उत्तर अशा चारही दिशांना प्रादेशिक कार्यालये आणि नऊ तालुका कार्यालये स्‍थापन करण्याबाबत आयुक्त योगेश म्हसे यांनी शासनाकडे प्रस्ताव पाठवला होता. या नव्या कार्यालयांसाठी आकृतीबंधातील मनुष्यबळ वापरण्यासही शासनाने परवानगी दिली आहे.

कोट :
चार प्रादेशिक आणि नऊ तालुकास्तरीय कार्यालयांपैकी तालुकास्तरीय कार्यालयासाठी प्राधान्य देण्यात येत आहे. यात तहसील, पंचायत समिती आणि नगरपालिका कार्यालय परिसरात तात्पुरते भाडेतत्वावर किंवा ‘पीएमआरडीए’च्या सुविधेमधील जागेचा शोध घेतला जात आहे.
- शिवप्रसाद बागडी, अधीक्षक अभियंता, अभियांत्रिकी विभाग, पीएमआरडीए.