पिंपरी, ता. २५ ः ‘मराठी चित्रपट संवर्धन आणि प्रदर्शनास चालना’ या संकल्पनेतून महापालिका आणि मराठी चित्रपट असोसिएशन यांच्यातर्फे ‘नाट्यगृहात चित्रपट’ संकल्पना राबविण्यात आली. त्याअंतर्गत चिंचवड येथील प्रा. रामकृष्ण मोरे प्रेक्षागृहात आयोजित चित्रपटांना रसिकांचा उदंड प्रतिसाद मिळाला. महोत्सवाचा समारोप मंगळवारी झाला.
चिंचवड येथील रामकृष्ण मोरे नाट्यगृहात नवीन मराठी चित्रपट दाखवण्यात आले. यामध्ये ‘मुक्काम पोस्ट बोंबिलवाडी’, ‘इलू इलू’, ‘मुक्काम पोस्ट देवाचं घर’, ‘चिकी चिकी बुबूमबूम’, ‘श्यामची आई’, ‘संगीत मानापमान’ अशा चित्रपटांचा समावेश होता.
असोसिएशनचे प्रदेशाध्यक्ष बाबासाहेब पाटील म्हणाले, ‘‘महोत्सवाला सात हजारांवर प्रेक्षकांनी भेट दिली. चित्रपटाचा दर फक्त ५० रुपये असल्यामुळे प्रेक्षकांची संख्या मोठ्या प्रमाणात होती. प्रेक्षकांना फक्त चित्रपट पाहायचा आहे, तो पण माफक दरात त्यांच्या खिशाला परवडेल असा, असे महोत्सवातून दिसून आले.’’

‘‘मराठी चित्रपट मराठी प्रेक्षकांपर्यंत पोचवण्याचं हक्काचं स्थान म्हणजे नाट्यगृह ठरू शकतात, याची ही पावती आहे. मल्टिप्लेक्समध्ये मराठी चित्रपट लागत नाहीत. लागल्यास तिकीट दर अधिक असतात. ही संकल्पना भविष्यात मूर्त रूपात येऊ शकते.
- पद्मेश कुलकर्णी, प्रेक्षक, चिंचवड

‘‘कामावर जायचे असूनही मराठी चित्रपट पाहण्याच्या ओढीमुळे सकाळी साडेआठचा चित्रपट पाहण्यासाठी नाट्यगृहात आलो. चित्रपटाचा आनंद आमच्या वेळेनुसार व ५० रुपये तिकीट दरात बघायला मिळाल्याचे समाधान आहे.
- आर्या देशपांडे, प्रेक्षक, निगडी
---