बनावट ॲपद्वारे ३३ लाखांना गंडा

पिंपरी : बनावट ॲप तयार करून त्याद्वारे शेअर मार्केट आणि आयपीओ खरेदी करण्यासाठी गुंतवणूक करण्यास सांगून एका व्यक्तीची ३३ लाख रुपयांची फसवणूक करण्यात आली. ही घटना बावधन येथे घडली.
या प्रकरणी ४१ वर्षीय व्यक्तीने बावधन पोलिस ठाण्यात फिर्याद दिली आहे. त्यानुसार जयंत पिरॅमल व एका एजंटवर गुन्हा दाखल झाला आहे. फिर्यादी यांनी गुंतवणूक केली असता त्यांना त्याचा परतावा अथवा गुंतवलेली रक्कम परत न देता त्यांची ३३ लाख ४० हजार ८८५ रुपयांची फसवणूक केली.

भाडेकरूची फसवणूक
पिंपरी : फ्लॅटसाठी दिलेली अनामत रक्कम परत न देता भाडेकरूची फसवणूक केल्याप्रकरणी दोघांवर गुन्हा दाखल झाला आहे. ही घटना बाणेर येथे घडली. या प्रकरणी बाणेर येथील ५१ वर्षीय व्यक्तीने बावधन पोलिस ठाण्यात फिर्याद दिली आहे. त्यानुसार एका महिलेसह दोघांवर गुन्हा दाखल झाला आहे. फिर्यादी यांनी आरोपींचा फ्लॅट भाड्याने घेतला होता. त्यावेळी फिर्यादी यांनी आरोपींना एक लाख ३५ हजार रुपये अनामत रक्कम दिली होती. फिर्यादी यांनी फ्लॅट सोडण्यापूर्वी महिला आरोपीला माहिती दिली. तरी देखील त्यांनी रक्कम परत न देता फसवणूक केली.

अल्पवयीन मुलाकडून पिस्तुल जप्त
पिंपरी : पिंपरी-चिंचवड पोलिसांच्या गुन्हे शाखेच्या खंडणी विरोधी व औद्योगिक तक्रार निवारण पथकाने एका अल्पवयीन मुलाला ताब्यात घेत त्याच्याकडून एक पिस्तुल आणि एक जिवंत काडतूस जप्त केले. ही कारवाई मोशीतील संतनगर येथे करण्यात आली. संतनगर, मोशी येथे एक अल्पवयीन मुलगा पिस्तुल घेऊन आल्याची माहिती पोलिसांना मिळाली. त्यानुसार पोलिसांनी सापळा रचून मुलाला ताब्यात घेतले. त्याच्याकडून पन्नास हजार पाचशे रुपये किंमतीचे एक पिस्तुल आणि एक जिवंत काडतूस जप्त केले. त्याने हे पिस्तुल दीपक वाघमारे याच्याकडून आणले होते. त्यामुळे दीपक वाघमारे (रा. मोशी) याच्या विरोधातही गुन्हा दाखल करण्यात आला.