पिंपरी, ता. २४ : जेनेरिक औषधांसाठी दिलेला १५ लाख रूपयांचा धनादेश न वटल्याप्रकरणी आरोपी डॉक्टरला १८ लाख रूपयांची नुकसान भरपाई देण्याची शिक्षा प्रथम वर्ग न्यायदंडाधिकारी बी. डी. चोखट यांनी नुकतीच ठोठावली.
तळवडे येथे हॉस्पिटलसाठी जागा भाड्याने घेऊन त्यामध्ये जेनेरिक औषधांचे गाळे बनविणार असून ते फिर्यादी स्वप्नील पोपट भालेराव यांना देण्याचे आश्वासन डॉ. महेश रघुनाथ काकडे यांनी दिले होते. त्यानुसार करारनामा करून फिर्यादीकडून आरोपीने १५ लाख रूपये घेतले. मात्र पुढे आरोपीने नियोजित हॉस्पिटलच्या जागेत फिर्यादीस गाळा दिला नाही. पाठपुराव्यानंतर आरोपीने दिलेला धनादेश बॅंकेत वटला नाही. त्यामुळे फिर्यादी यांनी २८ एप्रिल २०२३ रोजी आरोपी विरोधात पिंपरी न्यायालयात खटला दाखल केला. न्यायालयाने आरोपी डॉक्टर डॉ.काकडे यांना १८ लाखांचा दंड ठोठावला. तसेच ही रक्कम न भरल्यास दोन महिन्यांची कैद सुनावली. या प्रकरणी फिर्यादीतर्फे ॲड. कुंडलीक गावडे व ॲड. चंद्रकांत माने यांनी काम पाहिले.