रिवॉर्ड पॉइंटच्या बहाण्याने ६५ हजारांना गंडा
पिंपरी : क्रेडिट कार्डवरील रिवॉर्ड पॉईंटच्या नावाखाली एका तरुणाची ६५ हजार रुपयांची ऑनलाइन फसवणूक करण्यात आली. ही घटना पिंपळे सौदागर परिसरात घडली. या प्रकरणी पिंपळे सौदागर येथील ३७ वर्षीय तरुणाने सांगवी पोलिस ठाण्यात फिर्याद दिली आहे. त्यानुसार अज्ञात आरोपीवर गुन्हा दाखल झाला आहे. फिर्यादी यांना एका मोबाईल क्रमांकावरून फोन आला. आरोपीने तो अ‍ॅक्सिस बँकेतून बोलत असल्याचे सांगून एका महिलेने रिवॉर्ड पॉईंटसच्या माध्यमातून सूट देण्याची बतावणी केली. नंतर एक लिंक पाठवून ६५ हजार रुपयांची फसवणूक केली.

साहित्याच्या चोरीप्रकरणी कामगारावर गुन्हा
पिंपरी : कंपनीतील साहित्य चोरल्याप्रकरणी कामगारावर गुन्हा दाखल करण्यात आला आहे. ही घटना तळवडे येथील कार्बन कंपनीत घडली. मोहसीन अत्तार (रा. विकासनगर, किवळे, ता. हवेली, पुणे) असे गुन्हा दाखल झालेल्या आरोपीचे नाव आहे. या प्रकरणी सुरिंदरपालसिंग चरणजितसिंग गुलाटी (रा. बालमोराल इस्टेट, बाणेर, पुणे) यांनी देहूरोड पोलिस ठाण्यात फिर्याद दिली आहे. आरोपीने कंपनीतील कॉपर व टंगस्टन कार्बाईड असे एकूण ७४ हजार ७११ रुपयांचे साहित्य चोरून नेले.