पिंपरी, ता. २७ ः चाळी, गावठाणांतील बैठी घरे व झोपड्यांमध्ये पाणी शिरले; रस्त्यांवरील खोलगट भागांसह भुयारी मार्गांत पाणी साचले; रस्त्यांवर खड्डे पडले, पाण्याचा निचरा होण्यासाठी चर खोदावे लागले. अनेक नागरिकांना कामावर किंवा कामावरून घरी जायला उशीर झाला, जनजीवन विस्कळित झाले अशी अवस्था जोरदार पावसाने पिंपरी-चिंचवडकरांची केली आहे. सोमवारी सायंकाळी थोडी विश्रांती घेतलेला पाऊस रात्रभर धो-धो कोसळला. मंगळवारी दिवसभर रिपरिप सुरू होती. त्यामुळे दरवर्षी मे महिन्यात उकाड्याने हैराण होणाऱ्या नागरिकांना एसी, कुलर बंद ठेवावे लागत आहे. घराबाहेर पडताना छत्री व रेनकोट वापर करावा लागत आहे.
पिंपरी-चिंचवड परिसरात १६ मेपासून पाऊस सुरू आहे. आधी काही भागात अधून-मधून हजेरी लावलेल्या मॉन्सूनपूर्व पावसाने तीन दिवसांपासून रौद्ररूप धारण केले आहे. विजांचा कडकडाट आणि ढगांच्या गडगडाटासह हजेरी लावलेला पाऊस चांगलाच स्थिरावला आहे. गेल्या आठवड्यात जवळपास ६४ ठिकाणी झाडपडीच्या घटना घडल्या होत्या. अनेक ठिकाणी पाणी साचले होते. त्यामुळे महापालिकेच्या नालेसफाई आणि सांडपाणी वाहिन्या व पावसाळी नलिका साफसफाईचा दावा चव्हाट्यावर आला होता. त्यामुळे महापालिकेने आठही क्षेत्रीय कार्यालयस्तरावर व अग्निशामक दलाच्या उपकेंद्र स्तरावर उपाययोजना करण्यासाठी पथके नियुक्त केली आहेत. दोन दिवसांपासून पावसाने अधिक जोर धरला आहे. त्यामुळे सर्वच रस्त्यांवर पाणी साचले आहे. त्यामुळे पुणे-मुंबई, पुणे-नाशिक व मुंबई-बंगळूर महामार्गांसह अंतर्गत रस्त्यांवर वाहतूक कोंडी होत आहे. त्याचा फटका प्रवाशांना बसत आहे. अनेक भागात वीजपुरवठा खंडित होण्याच्या घटनाही घडल्या आहेत. समाविष्ट गावांमध्ये अर्थात चऱ्होली, डुडुळगाव, मोशी, चिखली, रावेत, किवळे, मामुर्डी, वाकड, ताथवडे, पुनावळे येथील शेतांमधील पिकांचेही अतिपावसाने नुकसान होऊ लागले आहे.

दृष्टिक्षेपात पाऊस परिणाम
- इंद्रायणी, मुळा, पवना नद्यांच्या पाणी पातळीत वाढ, दुथडी भरून वाहू लागल्या
- मुळा नदीमध्ये मोठ्या प्रमाणात जलपर्णी वाहून आल्याने पत्र हिरवेगार
- मुंबई-बंगळूर महामार्गाच्या सेवा रस्त्यांची चाळण, मोठमोठे खड्डे
- मुंबई-बंगळूर महामार्गाखालील पुनावळे, ताथवडे, भुमकर चौक भुयारी मार्गात साचले पाणी
- पुणे-नाशिक महामार्गावर सद्‍गुरूनगर, मोशी उपबाजार भागात साचते पाणी
- मुंबई-पुणे महामार्गाच्या सेवा रस्त्यांच्या खोलगट भागासह आकुर्डी, चिंचवड, पिंपरी ग्रेडसेपरेटरमध्ये पाणी
- स्पाइन रस्त्यावर संतनगर चौक, जाधव सरकार चौक, पूर्णानगर सर्कलखाली साचले पाणी
- लोहमार्गाखालील सिद्धार्थनगर, शंकरवाडी, वाल्हेकरवाडी, रावेत भुयारी मार्गासह रस्त्यावर पाणी
- विविध कामांसाठी खोदलेले चरांसह पाणी मुरून सर्वच रस्त्यांवर खड्डे पडून खडी पसरलेली
- पुणे-मुंबई महामार्गावर मेट्रो व अर्बन स्ट्रीटचे काम सुरू असल्याने खोदकामाची ठिकाणी चिखल, वाहतूक संथगतीने

महापालिकेकडून उपाययोजना
- पाण्याचा निचरा करण्यासाठी चर खोदून पाण्याला वाट करून दिली जात आहे
- रस्ते दुभाजक व सेवा रस्त्यांसह कडेच्या झाडे-झुडपांच्या फांद्यांची छाटणी
- जुन्या झाडांच्या धोकादायक फांद्या कापून काढल्या जात आहेत
- आपत्कालीन स्थितीत अग्निशामक दलाच्या सर्वच उपकेंद्रांमिळून नऊ पथके तैनात
- अग्निशामक नियंत्रण कक्षाची हेल्पलाइन जाहीर
- आपत्कालीन परिस्थिती हाताळण्यासाठी १२ अधिकाऱ्यांची नियुक्ती
- साचलेल्या पाण्याचा निचरा होण्यासाठी दोन विद्युत पंपांची व्यवस्था
- खड्डे आणि चर बुजविण्यावर भर, डांबर, खडी, मुरूम, कॉंक्रीटचा वापर

- नदी काठ व पुरामुळे बाधित होणाऱ्या नागरिकांच्या स्थलांतरासाठी महापालिका शाळांमध्ये व्यवस्था
- नदीकाठच्या नागरिकांना सतर्कतेचा इशारा, पथके तैनात

आपत्कालीन पथक हेल्पलाइन (व्हॉटस्ॲप क्रमांक)
नियंत्रण कक्ष / ७७५७९६६०४९, ७०३०९०८९९१
पिंपरी / ८४८४०८११०१, ८४८४०८२१०१
भोसरी / ७०३०९०८९९२
प्राधिकरण / ७०३०९०८९९३
चिखली / ७०३०९०८९९५
थेरगाव / ८९५६०३९२४५
रहाटणी / ७०३०९०८९९४
मोशी / ८६००६९४१०१
तळवडे / ७०३०९०८९९६

रस्त्यांवर साचलेल्या पावसाच्या पाण्याचा निचरा करण्यासाठी चर खोदून वाट करून दिली जात आहे. सांडपाणी वाहिन्या व पावसाळी नलिकांमध्ये अडकलेला कचरा काढून त्या मोकळ्या केल्या जात आहेत. आठही क्षेत्रीय कार्यालयस्तरावर आपत्कालीन पथके तैनात केली आहेत. मोठ्या प्रमाणात पाणी साचल्यास त्याचा निचरा करण्यासाठी दोन विद्युत पंप तयार ठेवले आहेत. पाणी साचलेल्या व झापडपट्टीसंदर्भात आलेल्या तक्रारींनुसार त्या निस्तारणाची कार्यवाही केली जात आहे.
- मकरंद निकम, शहर अभियंता, महापालिका