पिंपरी, ता. २७ : मोसमी पावसाच्या तडाख्याने रस्ते, महामार्गांवर पाणी साचले. त्यामुळे वाहतुकीचा वेग मंदावून कोंडी होत आहे. सोबतच या पावसाने रेल्वे सेवाही विस्कळित झाली आहे. यामध्ये प्रामुख्याने मुंबईकडून येणारी चेन्नई एक्स्प्रेस, कोयना एक्स्प्रेससह लांब पल्ल्याच्या अनेक रेल्वेगाड्या मंगळवारी (ता.२७) उशिराने धावत होत्या.
हंगामातील पहिल्याच पावसाने मुंबईत रेल्वे रुळांवर पाणी साचले होते. त्यामुळे सोमवारी (ता.२६) प्रगती, हैदराबाद आणि कोणार्क एक्स्प्रेस सुमारे एक ते दीड तास उशिराने, तर काही एक्स्प्रेस पंधरा ते वीस मिनीटे उशिराने धावत होत्या. मंगळवारीदेखील पुणे आणि मुंबईला पावसाने झोडपले. त्यामुळे मुंबईहून सुटणाऱ्या चेन्नई एक्स्प्रेससह कोयना एक्स्प्रेस पाऊण ते एक तास उशिराने धावत होत्या. तर, इतर एक्स्प्रेस २० ते ३० मिनिटे उशिराने धावत होत्या. मात्र, पुणे- लोणावळा लोकल सेवा नियोजित वेळेनुसार सुरू होती. तसेच पुण्यातून सुटणाऱ्या एक्स्प्रेसही वेळेत धावत होत्या.

सोमवारी मुंबईवरुन येणाऱ्या काही एक्स्प्रेस गाड्यांना उशीर झाला. पण, मंगळवारी कोयना आणि चेन्नई वगळता इतर एक्स्प्रेस सुरळीत होत्या. पुण्याहून सुटणाऱ्या एक्स्प्रेस वेळेत धावत आहेत.
- हेमंतकुमार बेहरा, जनसंपर्क अधिकारी, मध्ये रेल्वे-पुणे विभाग