पिंपरी, ता. १६ ः सलग तीन दिवस पडणाऱ्या संततधार पावसाने मंगळवारी (ता. १६) काहीशी विश्रांती घेतली. मात्र, शहर परिसर व उपनगरांमध्ये अधून मधून पावसाच्या सरी पडतच होत्या. त्यामुळे घराबाहेर पडणारे नागरिक रेनकोट व छत्री घेऊनच बाहेर पडताना दिसून आले. पावसामुळे शहरातील रस्त्यांवरील खड्ड्यांमध्ये झालेली वाढ तसेच रस्‍त्यावर आलेल्या दुचाकी यामुळे सकाळी व सायंकाळी शहरातील वाहतूक मंदावल्याने कोंडी झाल्याचे चित्र दिसत होते. तीन दिवसांपासून पडणारा पाऊस, ढगाळ वातावरण यामुळे वातावरणात चांगलाच गारठा जाणवत होता. यामुळे शहरातील कमाल व किमान तापमानातही घट झालेली दिसून आली. चिंचवडचे कमाल तापमान २४.८ अंश सेल्सिअस तर किमान तापमान २२ अंश सेल्सिअस नोंदविण्यात आले.