पिंपरी, ता. १९ ः पिंपरी-चिंचवड शहरातील नागरिकांना आपले प्रश्न आता राज्याचे उपमुख्यमंत्री अजित पवार यांच्यासमोर मांडता येणार आहेत. काळेवाडीतील एका हॉटेलमध्ये उद्या शनिवारी (ता. २०) सकाळी नऊ वाजता पवार यांच्या उपस्थितीत जनसंवाद उपक्रम होईल. पिंपरी-चिंचवड महापालिकेच्या सर्वच विभागातील अधिकारी नागरिकांच्या प्रश्नांचे जागीच निराकरण करतील. त्यानंतर रविवारी (ता. २१) पवार कार्यकर्त्यांच्या गाठीभेटी घेणार आहेत. नागरिकांच्या समस्या काय, त्या न सुटण्याची कारणे काय, किती दिवसांत समस्या निकाली काढल्या जाणार अशा प्रश्नांची उत्तरे अधिकाऱ्यांना द्यावी लागतील. त्यामुळे नागरिकांना आपले प्रश्न मांडून ते सोडवून घेण्याची संधी आहे. त्यासाठी नागरिकांना अनेकदा कार्यालयांत हेलपाटे मारावे लागतात. अधिकारी तांत्रिक सबबी पुढे करतात. त्यामुळे त्यांचे प्रश्न सुटत नाहीत. अशावेळी अजित पवार यांच्यासमोर अधिकाऱ्यांना उडवाउडवीची उत्तरे न देता ठोस कारण सांगावे लागेल. त्यामुळे जनसंवाद उपक्रमात जास्तीतजास्त सहभाग घेतल्यास नागरिकांचे प्रश्न कायमचे निकाली निघतील.
-----