पिंपरी, ता.२५ ः भोसरी येथे महाराष्ट्र कामगार कल्याण मंडळ, कामगार कल्याण केंद्र चाकण यांच्यातर्फे नवरात्री निमित्त रक्तदान शिबिर पार पडले. सीआय इंडिया ऑटोमॅटिक कंपनीत झालेल्या शिबीरात १५१ कामगारांनी रक्तदान केले.
शिबीराचे उद्घघाटन प्लॅन्ट प्रमुख निवृत्ती बच्छाव, मनुष्यबळ विभागप्रमुख बाळासाहेब पाटील, दत्तात्रेय पडवळ, प्रशांत शर्मा यांच्या हस्ते करण्यात आले. पुणे ब्लड बँक हडपसरच्या रक्तपेढीचे तज्‍ज्ञ डॉ. स्नेहल गिरमकर यांनी रक्तदानाचे महत्त्व कामगारांना सांगितले. सीआयई इंडिया गणेश मंडळातर्फे रक्तदात्यास स्मार्ट वॉच, प्रमाणपत्र तसेच ट्रॉफी देण्यात आली. केंद्राचे संचालक अविनाश राऊत यांनी विविध योजनांचा लाभ कामगार वर्गाने घ्यावा असे आवाहन केले. यावेळी कामगार कल्याण मंडळ, कामगार कल्याण केंद्र यांच्या वतीने आस्थापना व संघटना यांना सन्मानचिन्ह देवून गौरवण्यात आले. दत्तात्रेय धावडे, सुभाष जमादार, ज्ञानेश्वर कळमकर, दीपक अरगडे, कृष्णदेव थोरात यांनी नियोजन केले. शंकर नाणेकर आणि अण्णा जोगदंड यांचे सहकार्य लाभले.