पिंपरी, ता. २७ : शहरात शालेय विद्यार्थ्यांची वाहतूक करणाऱ्या बस, छोट्या व्हॅन व रिक्षा अवैध व धोकादायक पद्धतीने विद्यार्थ्यांची वाहतूक करीत असल्याचे निदर्शनास आले आहे. अशा वाहनांवर कारवाई करण्यासाठी प्रादेशिक परिवहन अधिकारी, पिंपरी चिंचवड कार्यालय व पिंपरी-चिंचवड वाहतूक पोलिस यांनी संयुक्त मोहीम राबवली. प्रादेशिक परिवहन कार्यालयाच्या चार वायुवेग पथकांमार्फत एकाच दिवसात २०५ वाहनांवर कारवाई करण्यात आली.
या कारवाईत एकूण १७० बस तपासण्यात आल्या. त्यातील ७७ बसवर कारवाई करण्यात आली. तर एकूण १५७ व्हॅन व रिक्षा तपासण्यात आल्या. त्यातील १२८ व्हॅन व रिक्षावर कारवाई करण्यात आली. दरम्यान संबंधित वाहन चालकांकडून सात लाख ९७ हजार ७५० रुपयांचा दंड वसूल करण्यात आला.