पिंपरी, ता. ४ : शहरातील गृहप्रकल्पांमध्ये लिफ्ट दुर्घटना वारंवार घडत आहेत. याबाबत लिफ्टचे तातडीने सुरक्षा ऑडिट करावे, अशी सूचना आमदार शंकर जगताप यांनी शासनाच्या उद्योग, ऊर्जा व कामगार विभागाकडे निवेदनाद्वारे केली आहे.
चोविसावाडीतील राम स्मृती सोसायटीत दोन ऑक्टोबरला १२ वर्षांच्या अमेय फडतरे याचा लिफ्ट दोन मजल्यांच्यामध्ये अडकल्याने दुर्दैवी मृत्यू झाला. अशा दुर्घटना अनेक वेळा घडत आहेत. या पार्श्वभूमीवर आमदार जगताप यांनी म्हटले की, ‘उद्योग, ऊर्जा व कामगार विभागाच्या मार्गदर्शक तत्त्वांनुसार लिफ्टची नियमित तपासणी न केल्यामुळे वारंवार प्राणहानी आणि गंभीर अपघात होत आहेत. अशा या अपघातांकडे दुर्लक्ष करणाऱ्या अधिकाऱ्यांवर कडक कारवाई होणे अत्यावश्यक आहे. या बाबत पुढील उपाययोजना तातडीने राबवावी. नागरिकांच्या जीविताला धोका निर्माण करणाऱ्या अशा घटनांकडे गांभीर्याने पाहण्याची गरज असल्याने संबंधित विभागांनी तातडीने ठोस व काटेकोर कारवाई करावी.’
---
लिफ्टबाबत मुद्दे
- सर्व सोसायट्यांमधील लिफ्टची तपासणी करून प्रमाणित अहवाल सादर करावा
- निकृष्ट व अप्रमाणित लिफ्ट त्वरित बंद करून शासनाच्या नियमावलीनुसार कारवाई करावी
- नियमांचे पालन न करणाऱ्या बिल्डर, डेव्हलपर व सोसायटी व्यवस्थापनावर दंडात्मक व कठोर कारवाई करावी.
- प्रत्येक सोसायटीमध्ये प्रशिक्षित लिफ्टमनची नियुक्ती सक्तीची करावी
- लिफ्ट सुरक्षिततेसंबंधी नागरिकांसाठी जनजागृती मोहीम राबवावी
---